Home / / Paul, met liefde veur ‘t dialekt

Paul, met liefde veur ‘t dialekt

Bukkumbode 2019

De poashoas is ’t laand nog niet uut ‘esprong’n, of doar hej d’n keel’ uut Spanje m’t zien veelziedige en veelkleurig’n knecht’n wieder, en veur-ie ’t wet klingelt en klangelt d’n arreslee oaver d’n Dalser daak’n, heur-ie de kanonsknall’n met d’n twee c’s – carbid en cobra’s – en bunt wulle op weg noar d’n letste daag’n van ’t joar. De Bukkumdaag’n, op moandag en diensdag disse keere, um’t joar goed af te sluut’n. De tied tikt deur, en ‘n joar is wieder zo veurbie.

Met de tied begint d’ joar’n ok te tell’n en wulle ‘ebt een apaart’n wisseling van ‘t olde noar ’t neie te vier’n. Vooral veur de Bukkums was’t ’n bijzoand’re twoalf maand’n, woarbij wulle onder aander’n iene van ’t allereerste en ’t alleroldste bestuur bunt verloren. Wulle ‘ebt noatuu’lk oaver Paul Jacobs, de geest’lk voader van disse rubriek, det ‘ej joar’n lang met verve hef ‘evuld. Met ‘n skier pennegie en ‘n kritisch’n blik, en met ‘t geveul en liefde veur ’t dialekt. Pass’nd om Paul op disse plek ’n eer’betoon te geev’n, as ien van de opricht’rs det generaazies van noe de saamheurg-hied an ’t ende van ’t joar hef bie-ë-bracht.

‘n echte Bukkum, in de eerste joar’n woon’nd midd’n in de beruumste buurte van Dals’n. De buurte met de viskroame van keugie, nabie de Veer Gezicht’n met doarachter De Bleeke, deur Paul liefdevol omskreev’n als ’t binnenploatsie woar de wasse te dreug’n werd e-hang’n. En kon met verve ok vertel’n oaver ’t toernooi zelf, met joarlijks ‘t verhoal over ien van de eerst keer’n, toen de Bukkums een bokking in ’t doele had’n ‘ehang’n om de Trefkoele noar vis te loat’n ruuk’n. Een groot sukses, en Paul en zien kornuut’n werd’n verzog det moar niet wieder te doen. ’t Stunk te vulle.

‘Bukkums goat d’r al 40 joar veur’, schref Paul veer joar e-led’n boav’n zien letste boode in d’n Opregte Dalser Krante. En det zult wulle doen, noe ‘ej in februari oans achter ‘ef ‘eloat’n en van boav’n op oans neerkiekt. Paul, uut-e-wapperd oaver ’t binnen- en buut’nland, geniet’nd van ’t leem, ’t weerzie’n met olde bekend’n en de skerpe grapp’n en een karakterstieke greins. Wulle zult-oe niet vergett’n.

‘n speziaal’n editie dus, dis joar, met oaver ’t algemien d’zelde speerpunt’n as de letste joar’n. Er wurdt de letste tied wat af-e-roeptoeterd oaver d’n meteorloogisch’n verskill’n met vrôgger en de effekt’n det ’t hef op ’t klimoat. De Bukkums ‘ebt zich det moar al te goed in-ê-prent en dus ‘ijst ’t gezelskap um ’t goede veurbeeld te geev’n ok dit joar weer op ‘t iezeren ros veur ’n gezund fietsrundtie deur de regio. En och, om ok d’n protesteer’nde agraariers te wille te wee’n, griept wulle hier, moar ok doar, nog empies wat gerst met. In een gleuzie.

Dramm’n, ’t heurt er teeg’nwoordig bie, en ’t zoal niet lange meer duur’n veur ok de lokaal’n in Dalsen veur ’t gemeentehuus oproer zult kraaien. Moar ja, dan mut eerst nog eem ’t veurplien met de grond geliek ‘emaakt worden en ok doar wurd al oaver e-protesteerd… Miskien dat er nog ‘n bouwbedrief tied oaver hef, moar aj de huuz’n in Oosterdals’n uut de groand ziet vlieg’n, dan kuj doar oe twiefels bij zett’n. Tied om iens achter de oor’n te krab’n oaver al det gedram, as de onmeunige zwierm rupsies al niet veur enoeg jeuk zorgt.

Twintigtwintig, het neie joar is in aantocht. Met een hels kabaal zal’t word’n e-vierd, een tradizie die over enkle joar’n ok al niet meer bestiet, doar kuj van op an. Wat den nog rest, is ’t Bukkum-gevuul, woar wulle mekander de moat nemt, en m’t friss’n blik terugge en boav’n-al noar veur’n kiekt. Op noar neie avontuur’n, wulle goat wat beleev’n. ’t Alderbeste.

Arjan Bosch

Lees ook

Online workshop Kinderjury en BoekStartCafé

OMMEN – Kinderen van 6 tot 12 jaar die mee willen doen aan de verkiezing …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.