Home / denne plat proaten as vak

‘En niet te völle zoepen dit weekend’ zeg ik mien studenten op de leste dag van hun werkwekke. Ik doe det al sinds joar en dag. Op Windesheim keken ze mie dan altied wat wazig an. Op Saxion Enschede begriept ze mie better: ‘Dat make wie zelf wel uut.’

denne plat proaten as vak

Toen ik mien verhaalties wel iens vöarlasse op Radio Oost, nam ik ze van te vöaren op in de studio van de School voor Journalistiek in Zwolle. D’r stund een kear een collega uut Amsterdam bie. Toen ik kloar was, mos de technicus lachen öm het verhaal. Die Amsterdammer had d’r niks van esnapt.

Toen ik de kroeg verleute in Roalte zei ik teeng kennissen ok det ze niet te völle mossen zoepen. Hun antwoard: ‘det had ie earder mu’nn zeng!’

Plat proaten, het zol een verplicht vak op schoele mu’nn wönn, zag ik in het neejs verbie komm. Mar ik ben teeng. Ik heb liever det ze op schoele de kostbare tied besteedt an learen wat ongezond etten met oe lichaam as chemische fabriek dut, an hoe ie een huushoaldportemonnee mut inrichten as ie goat samenwonen. Och, d’r is nog zo völle mear te learen dan plat proaten.

En trouwens: plat proaten kun ie al. Of ie kunt het niet. In beide gevallen is d’r gin enkele reden doar extra andacht an te besteden.

Kiek, die roeptoeters die plat proaten op schoele wult, die bent bange det plat proaten verdwient. Ik zol zeng: so be it.

An studenten in Zwolle – die meestentieds uut noord en midden Nederland kwamen, merken ik al det ze van mien plat niks mear begrepen. Tukkerse studenten wel, die proat het nog wel. Vake niet mear thuus, onderling met de kammeroaden ok nog weinig, wel nog met opa en oma.

Precies zo as det giet. Een uutstervend ras, net as det ie minder Amsterdams of Rotterdams höart. Det ie nog wel höart woar ientie weg kump, mar det ie mekare ok gewoon kunt verstoane. Want det lik mie nog wel het belangriekst. Det ie mekare kunt verstoane.

Denne van Knöldert

Lees ook

Vrijstelling van de btw met de KOR

REGIO – Ondernemers met een jaaromzet onder de 20.000 euro hebben nog een paar dagen …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.