Home / denne algoritme

denne algoritme

Alles wat ie doet op het internet wördt op’esloane en bevobbeld de reclame hölt doar dan rekkening met.

Zuuk ie vöar de zommer of de Kaap Verdische eilanden iets vöar oe bent, dan krieg ie de earste paar wekken doar op toegespitste vakantieideeën. Det metkieken via algoritmes giet verder dan ie denkt. Met een slimme energiemeter bevobbeld kunt ze ziene wannear ie de wasse doet en hoevölle stroom de wasmachine gebruukt. Ie kunt dan mar zo een reclame krieng van ‘wördt het niet ‘ns tied vöar een neej’n? Dissent gebruukt nogal völle stroom!’

De bonuskaarte van Albert Heijn werkt ok zo. AH gif oe niet van harte korting, ie leavert oe hele koopgedrag d’r vöar in, zodet ze oe heel gericht mear geld uut de zak kunt kloppen. En as ie Bol.com of Marktplaatst opent, krieg ie een ander startscherm dan ikke.

Google weet earder dan de dokters det d’r een griepgolf an kump, want dan zuukt d’r völle mear meansen op ‘hoe kom ik van die hoest of’. Google weet ok earder dan oe man of ie zwanger bent. En as ie iniens advertenties van echtscheidingsadvocaten kriegt, dan wus Google al lange det oe relatie niet zo solide mear is.

Facebook werkt ok zo. Afhankelijk van oe internetgedag stelt ze oe bevobbeld neeje ‘vrienden’ vöar, die dezelfde interesses hebt. As ie een vöarstel kriegt Janje of Pietje te volgen, kun ie d’r donder op ze’ng, det Jantje of Pietje van de wekke noar oe ezöcht hef op internet.

Vöar gescheiden olders is det wel lastig. Die hebt de wichter as gezamenlijke interesse, dus stelt Facebook oe steeds wear an oe ex vöar: ‘vriendje worden?’

Ik was lest bie een man in Amsterdam die wol weten woar Salland dan wel precies lag. Dus hij typen het in op Google en zeg: “zo, ule hebt wel völle seks-bedrie’m doar in Salland.” Ik zegge: ie mut niet zo völle porno kieken!” En toen kreeg e een rooie kop.

Denne van Knöldert

Lees ook

Zorghotel Imminkhoeve biedt tijdelijk wonen met zorg

LEMELE – Tijdelijk wonen met alle zorg, tijd en aandacht. Dat is mogelijk bij zorghotel …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.