Home / denne voaruutblik

denne voaruutblik

Vöarig joar waren det d’r een hoop. Cruijff, Bowie, Muhammad Ali, Fidel Castro, Rick Parfitt, mien va. Det waren vöar mie de grootsten, in willekeurige volgorde.

Prince, George Michael, Eddy Wally, Joop Braakhekke, Umberto Eco, Nancy Reagen en goa zo mar döar hebt de joarwisseling ok niet ehaald. Alles met elkare waren het er een hoop. Mar ik vöarspel det het d’r dit joar nog völle mear goat wönn. En ok det het d’r ieder joar mear en mear wördt. Wrum?

Nou, de wereld is d’r noa de Twidde Wereldoarlog anders uut goan ziene. Rock and Roll kwam op. De earste popbands ontstunden. Sport werd professioneel, dus kwamen d’r ok doar helden. De tillevisie werd groter en groter, dus kregen wie BN’ers, mar ok van uut het butenland learen wie meansen kennen. De roddelrubrieken staken de helpende hand toe.

En dan de babyboom. Noa de oarlog wönn d’r iniens völle mear meansen geboaren.

Ie hoeft dus gin geniaal ziener te weane öm met dreuge oong te bewearen det d’r ok dit joar wear heel völle groten der aarde zult ‘verscheiden’.

In de popmuziek verwacht ik het grootste slagveld. Helden die in de joaren zestig begunn’bent  noe achter in de zeumtig. Een heel respectabele leaftied vöar de lea’msstijl die die jongens en meissies destieds hadden. Of zoals George Kooijmans van de Earring lest zei: “Ik had mie zelf een korter leam in’eschat dan det ik noe al hebbe!” Zol oons een Rolling Stone ontvallen?

In de al mar groter wördende sportwereld goat d’r ok wel wear helden ofvallen. Sporten is gezond. Mar topsporten niet. En vanwege wat wie ollemoal nog níet weet van doping, denk ik det d’r vöaral in de wielrennerieje nog wel wat onverwachts geböart.

Nou, en dan dus die heel grote groep meansen die tussen 45 en 50 geboaren is. Ollemoal 70+.

Het mag eigenlijk niet, mar ik verheug mie op de mooie samenvattingen van hun lea’m.

Denne van Knöldert

Lees ook

Inzameling van het Leger des Heils

DALFSEN – Kleding, schoenen en vodden voor het Leger des Heils kunnen op donderdag 24 …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.