Home / denne risico

denne risico

Ik höaren ok de discussie of ie een maagband bie kinderen mag plaatsen, zodet ze niet mear zo völle kunt etten. Toen ik det höaren las ik net de earste regels van mien kerstpakketboek ‘eten als een expert’. Det 100.000 mensen per joar ziek wördt van te völle of verkeard etten, drinken en roken, det wie met steeds bettere medische zörg die meansen wel steeds langer in lea’m hoald, dus det d’r op dit moment 1,5 miljoen meansen in Nederland ziek bent vanwege, roken, drinken en etten.

Det is ien op de tiene.

Gezellig hè, al die feessies…

Op het perron stund ik van de wekke noast vier jochies die rokend op de trein stunn’ te wachten. Jonge jochies, want die bent nog bevattelijk vöar de doodseskaders van de rookindustrie. Eén van die vier is dood vöar det e met pensioen mag, zegt de statistieken.

Mar ik was op det moment mee-roker. Dus ik vroeg de NS via twitter woar ik ze an kan klagen wegens dood door schuld of poging tot moord met vöarbedachte rade.

Det liekt grote woarden, mar hoe langer ik d’r oaver noadenke, hoe logischer ik die gedachte eigenlijk vinne. Vöaral ok ömdet het anders kan. Central Park in Manhatten is verboden rookgebied. Zelfs in het Gorkipark in Moskou is het verboden te roken. En denk niet det niemand zich d’r an hölt. “Ik ben hier met mien wichter”, zei een Moskoviet teeng een Nederlandse student die zich van det rookverbod niks antrök.

Die 25-miljoen vöar een paar extra spoarbomen, verkearsdrempels in de stroate, autogordels, een helm op de brommert: de oaverheid beschermt ons volop teeng risico’s die direct zichtbaar bent. Wrum doet ze det niet teeng gevoar op lange termijn?

Denne van Knöldert 

Lees ook

Tien jaar G-voetbal in Ommen

OMMEN – Het G-voetbal in Ommen is begonnen als een gezamenlijk initiatief van OVC’21 en …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.