Home / denne agressie

denne agressie

Noe mut ule weten det ik an een weg wone die noa mien huus fietspad wördt en wieders vöar auto’s doodlopend is, dus breed is de ontsluting niet. En tegelieke is det pad geliefd bie fietsers en wandelaars. 

En ok bie hardlopers. Iene doarvan was net bezig met zien wekkelijkse röndtie toen ik d’r langs kwamme jaang. Ik geef toe, ik reed wat harder dan aans, mar van de andere kaante: d’r was ruumte zat vöar die hardloper en mie noast mekare.

Ik denk det het kwam döar zien koptillefoon det menear de hardloper wat schruk van mie. Dus in mien achteruutkiekspiegel zag ik zien misbaar. Zwaaiende armen en ömdet e niet net as voetballers een hand vöar de mond deud kon ik ziene det e vloeken.

Ben ie lekker an het sporten, krieg ie onderweg een te hoge bloeddruk.

Op de grens van het platteland en het dorp passearen ik een basisschoele. Het was zoaterdag, mar toch ging ik vanzelf zachter riene. Want wichter in die buurte weet niet better as det zie king of the road bent. Dan mos mien moat mar wat langer in det bos op zien konte blie’m zitten.

Mar mien riegedrag kon de goedköaring van twee belhamers van een joar of 8 niet wegdraa’ng. Net as die twee kleine jochies in de reclame die op de oprit van hun olders een botsing noaspölt, begunn ze noar hun vöarheufd te wiezen. Iene stak zelfs zien middelvinger op. Ik stoppen en vroeg wat d’r an de hand was. Iene begun direct te lippen. De ander eisen vöarrang. Ik zeg: “Vöarrang geldt niet vöar wandelaars. Dan ben ie een weggebruker en gin verkearsdeelnemmer. Kiek venoamd eam saam met oe va op HALT.nl want det goe ie later nog wel neudig he’mm.” Hij wol teenggas gee’m mar ik zeg: ‘Hoal oe bek of ik sloa ‘m dichte’. Toen was e wiezer.

Det leste is niet woar höar, mar ik stellen mie zien va vöar die det vaste wel zo zol doene. Want zo’n jochie immiteart natuurlijk.

Met mien moat veul het gelukkig met. Allenig een slag in het rad.

Denn van Knöldert.

Lees ook

Start herinrichting voorplein gemeentehuis Dalfsen

DALFSEN – NTP B.V. is met de ondertekening van de bouwteamovereenkomst officieel de aannemer die …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.