Home / archiefcentraal / denne random reader

denne random reader

D’r is wel mear techniek die ik niet snappe. Hoe werkt een tillefoon? Hoe werkt een tillefoon zonder droad? Wie vroagt het oons niet of, het is d’r gewoon. Mar as d’r iets nieuws bie kump, komt toch die vroang.

Zo heb ik mien oalders ‘ns uutelegd hoe email werkt. Ik heb ze earst verteld det ‘mail’ ‘post’ betekent. En det email verzenden gelieke is an een brief versturen. Postkantoar en postbode bent allenig anders.

En oe brievenbusse kan iedere computer op de wereld weane. Mar det had ik d’r better niet bie kunnen zeng, want öm det wear uut te leng… Ik zeg: ie vroagt oe toch ok niet of det oe tillefoon weet woar ik benne as ie mie op mien mobiel belt? “Ja, hoe kan det noe…”

Zoiets zal het ok wel weane met die klöarcodes. Iedere kear as ik bankzaken doe krieg ik een neeje ‘broadway boogie woogie’ van Mondraan op de random reader, die in een fractie van een seconde zut det het goed is.

Ik snap ok niet hoe mien e-reader een kwart joar op íen accu kan. “Ömdet hij per pagina mar íen kear energie gebruukt”, leng ze mie uut. “Det beeldscherm bestiet uut ontelbare balletjes die zwart of wit bent. Roep ie een neeje pagina op, dan selecteart zwart en wit zich zodoanig det d’r letters, woarden en zinnen stoat. En dan giet de stroomtoevoer wear dichte. Töt de volgende pagina.”

Snap ik det ok wear.

Dan de name. De meest Nederlandse banke van alle banken in Nederland keus vöar ‘random reader’. At random is willekeurig’. En reader is lezer. Een random reader least dus zo mar een bittie willekeurig wat weg. Det wekt niet al te völle vertrouwen in hoe secuur en veilig det systeem is.

Mar het bekt lekker en hij dut het nooit verkeard. Ik mut d’r mar an geleu’m det dinge die ik niet snappe ok goed kunt weane.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.