Home / archiefcentraal / denne van knoldert gif

denne van knoldert gif

As ie TBC hebt is det mooi tearing. En as ie gewas bestrijdt heb ie doar gif vöar neudig. “Mar wie gebruukt gin gif”, zegt boeren dan altied, “alles wat wie gebruukt, is wettelijk geoarloofd.” Asof ‘wettelijk geoarloofd’ gelieke is an ‘niet giftig’. Iedere 1 januari komt d’r wear neeje producten op de lieste van ‘verboden ömdet het gif is’ terwijl det op 31 december nog niet zo was.

De wet, de iene kear klage wie d’r op vanwege te völle regels, de andere kear schermt wie d’r met ‘want het mag toch?’ Toen roundup vöar particulieren verboden werd kochen heel völle kort van de vöaren nog eam een vöarröadtie. Het is mar woar ie een hobby in hebt…

Ander boeren-argument is det het in andere sectoren ok altied niet ea’m goed giet met milieuzaken. Doar ben ik niet zo van: van zelf niks doene ömdet het op andere vlakken ok niet in de haak is. Ik leave liever zoas ik graag wulle det het oaver een tied geregeld is, dan ben ik doar al mar vaste.

Mar as ie doar dan bent, kiek ie soms noar het ‘noe’ asof det ‘vrogger’ is. Zo verbaas ik mie dus hogelijk oaver de bloembolvelden in de regio en de hoevölheid gif doar op mut. Zie hoeft mie gin bössie bloemen mear cadeau te doene. Ik stund d’r ok dit vöarjoar wear van te kieken hoevölle gif d’r op maïs mut, zelfs lángs de maïs öm te vöarkomm’ – denk ik – det het grös teeng prikkeldroad gruuit? Disse dage giet det bespoten voedsel in as wintevöarroad. En in de wedstrijd tussen een schone oprit met gif of onkruud op de oprit zonder gif, kiest de meesten van ons bliekbaar vöar gif.

Raar. In mien toekomst is al det gif al lange in het grondwater ezakt en via drinkwater in ons lief.

Het is mar goed det geneeskundige bollebozen steeds mear mankementen in de chemische fabriek die ons lichaam is kunt reparearen.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.