Home / A / denne op herhaling ontgroenen

denne op herhaling ontgroenen

Het schient det studenten zich loat ontgroenen ömdet ze op die maniere bie een club terechte komt woar ze de rest van de studie met op kunt trekken. Ik binne van mening det ie zonder ontgroening ok wel bie een club terechte kunt komm. Want zo giet det oaveral anders in de maatschappij ok.

Wat d’r oaver blif is det onneudige ontgroeningsritueel det döar de universiteiten ok nog iens gesubsidieerd wördt. Want de studentenverenigingen kriegt geld en een gebouw woar ie goedkoop dronken kunt wönn. Een gesubsidieerd alcoholprobleem dus.

Wat hoalt die ontgroeningen in? En wat kump d’r van die meansen terechte die het ontgroenen bedenkt? Earst det leste mar.De luu die ongroent, wördt later ingenieur en doctorandus. Het wördt de meansen op slöttelposities in oonze maatschappij. Het bint de beslissers in de industrie en bedenkers in de politiek. As ie noe weet det een bittie ontgroening gelieke stiet an vernedering en onderdrukking… 

Een vöarstel: wie goat het verleden van al die döargelearde omes en tantes noa en wie d’r zich as een klein Hitlertie gedraang hef, die krig ontslag. Zelf regelt ze det niet, want onderling hebt ze of esprökken niks oaver de inhold van die ontgroeningen te vertellen. Det is een regel bie de studentenverenigingen en op die maniere hoalt ze mekare een haand boam het heufd en kunt ze ongestoard wieder goan met vernederen en onderdrukken. Mar het leup vöarig joar wear zo de spuigaten uut det oldstudenten een onderzuuk ehoalen hebt. En doar kwaamp de bearputte van löss.

Ie kriegt verstoppingsmiddelen zodet ie dree dage niet kunt poepen, mar ie kriegt tegelijke ok plastabletten. Ie mut tien liter water drinken op een dag. Of een liter jenever. Zie loat oe 24 uur in een Lotushouding zitten. Ie mut as een hond döar de zaal kroepen en noar oe baassie (een meardigjoarige student) kwispelen en zien haand likken. Langdurig een kearse in de mond hoalen. Rauwe eieren kapot bieten. Langdurig geboeid in een kooi zitten. Met bier oavergötten wönn. Half naakt poaldansen. Een pöttie mosterd löag etten. Twee nachten niet sloapen en dan twee uur hard lopen. Verplicht heel hard lachen öm slechte moppen van een meardejoars. En zo voort.

En d’r ontstoat vriendschappen vöar de hele studietied…

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.