Home / / denne gruun vinkie

denne gruun vinkie

Het least vöar de kenner as een gewone zinne. En die kenner zal denken “wrum noe pas op Windows10?” of in het geval een Mac-vöarkeur, “wrumm in hemelsnaam nog op Windows?”

Mien va en moe snapt d’r noe al hillemoal niks mear van. Die verstuurt nog regelmoatig een email, “mar het duurt zo lange vöar wie de goeje letters op det toetsenbörd ‘evunn hebt.” Dus die mut ik niet lastig vallen met doc, docx, pdf, mp3, mov, jpg en png.

Lest vreug iemand mie een ofspraak te maken in doodle, terwijl ik nog niet iens an de google-agenda toe benne. En de iene kear krieg ik teksten via de google-drive, de andere kear stiet het ergens in de cloud en soms ok in dropbox. Soms doet ze ’t ok via wetransfer.

Ik kan het zelf ollemoal nog wel bie sloffen. Ok ömdet ik alderjezus traag internet hebbe (ik was mie vöar vakantie op google maps an het kieken woar Xhanti in Griekenland lig, zag ik an de linker kante van het scherm al Griekse letters, terwijl ik rechts de Nederlandse kaarte nog zagge…), zodet ik tied van noadenken hebbe.

Whatsapp gif met een klökkie achter oe bericht an det het nog niet verzunden is. As het klökkie een v wördt, dan is e uut oe tillefoon weg. Een vv zeg det e bie de geadresseerde is. En as de vv blauw is, hef de andere kante oe bericht ok e opend. Ik kreeg lest in plaatsen van die blauwe vv een gruun vierkantie met een witte v d’r in. Wat is det noe nog wear vöar extra toevoeging?

Het gif mie ollemoal te denken oaver de tied van de vöaruutgang. Het valt mie ollemoal nog vies teeng. Alles wat d’r geböart is det wie dezelfde dinge steeds anders doet. Det is heel wat anders dan neeje dinge doene.

Denne van Knöldert

Lees ook

Boek van de Week: ‘Het verbrande huis’

Bodil bezoekt, ze is dan zes, in 1970 samen met haar ouders en broertje voor …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.