Home / archiefcentraal / denne van knoldert dienstplicht

denne van knoldert dienstplicht

Ik had nog ea’m de hoppe det journalisten Buma zien opmerking uut de context erukt hadden. Det de leider van de christelijke politiek misschien maatschappelijke dienstplicht bedoelen. Buma: ‘Mensen van allerlei pluimage een dienst loaten doene vöar het land. Want de maatschappij wördt al mar individualistischer’.

Klinkt niet verkeard. Mar op het Journaal zei Buma: ‘dienstplicht bij een organisatie als Defensie om ons land te verdedigen.’

Ik zei al: knettergek

Christenen dwingt mekare via angst en onderdrukking töt een goed lea’m. Het systeem kent hel en verdoemenis. En as det niet helpt, heb ie altied nog de pastoar die de hel op aarde kan maken. Christelijke ouderlingen voert de druk nog hoger op.

Doar kump het idee dus vandan det ie met repressie en onderdrukking mensen op de rit kunt krieng.

Had ik al ‘ezegd det ze knettergek bent bie het CDA? Een typisch geval vöar op de brandstapel, zol ik denken.

Ik heb in het leger ‘ezetten. Ik mos learen andere meansen dood te schieten. Ik mos learen de onderbroeken ollemoal precies hetzelfde op te vouwen en op gelieke stapelties op hun vaste plekke in de kaste near te leng en as iene van de kamer det niet deut, moss’n wie ollemoal noablie’m.

Ik mosse met rielessen learen achter een mooi meissie an te riene en toen ik det niet deud mos ik noar de kapitein en toen in de rieles-sergeant vreug of e mee gong hoe’m det iniens niet mear.

Ik heb eleard vöar weinig geld te völle te zoep’m. En ik zag op oefening dienstplichtige soldoaten verschikkelijke moatenneijers wönn!

Menear Buma, geacht CDA, ule constateart misschien best een goed probleem. Mar met de oplossing die ule d’r vöar denkt te he’mm vergroot ule allenig mar det probleem.

Wat is dan wel de oplossing? Nou, vanuut de wetenschap det wichter hun olders noa doet, mut ie volgens mie doar de oplossing zuken. Ik zag dit weekend twee klootjochies een stroeke kapot trappen en toen ik langs reed, naa’m ze een karateholding an van ‘kom mar op’. Det kiekt die schattige duvelties of van pappa. Een klap an de kop mossen ze he’mm!

De oplossing zit ‘m in een olderschapsdiploma. Iederiene die wichter wul, mut doar earst een opvoeddiploma vöar halen…

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.