denne busje komt zo

Die tillefoon hef alles te maken met ‘even Apeldoorn bellen’, van die reclames. Det d’r van alles mis giet en det ie dan het beste mar eam de verzekering kunt bellen: Achmea in Apeldoorn.

Het zol mie niet verbazen as heel völle van ule die relatie tussen die reclame, Apeldoorn en een goeie verzekering nog niet earder elegd haa’n. De leus ‘even Apeldoorn bellen’ is zo krachtig ‘ewönn, det ie zo mar de relatie met de verzekering zol vergetten.

Ik heb zoiets in het centrum van Willemstad op Curaçao ok met emaakt. Doar heet een snackbar ‘Patatje komt zo’. Ik heb doar wat rond evroagd, mar noch het personeel, noch de meeste patat-etters hadden gin idee woar die woardspölling vandan kwam. “Gewoon det de patat d’r zo an kump”, dachen ze. Van ‘Busje komt zo’ haa’n ze trouwens wel vaag ooit een kear iets van met ‘ekreeng.

In de wachtkamer bie Achmea, woar ie terechte komt as ie bie de tillefoonrotonde rechts goat, mos ik doar an denken. In die wachtkamer verwiest ze noar de bushalte. Inderdaad met as opschrift: ‘busje komt zo’.

Busje komt zo. Zo’n slagzinne kun ie vaste wel registrearen. Det aanderen mut betalen vöar gebruuk. Zol Höllenboer det edoane he’mm? Ik zol zeng: ‘Even Apeldoorn bellen’.

Denne van Knöldert

LAAT EEN REACTIE ACHTER

Vul alstublieft uw commentaar in!
Vul hier uw naam in

Deze site gebruikt Akismet om spam te verminderen. Bekijk hoe je reactie-gegevens worden verwerkt.