Home / archiefcentraal / denne van knoldert onderzuuk

denne van knoldert onderzuuk

D’r veul een stilte.

Wie zaten in de trein noar Enschede. Oavervol beladen. Mar bie ieder station kon d’r nog wel volk bie in. Ik mut d’r dan altied toch onwillekeurig an denken det wie op weg bent noar de Duutse grens. Dus as d’r dan zo’n niet-conducteur langs kump öm te onderzuken met welk kaartie ik reis van woar noar woar, dan doe ik niet zo mar gedwee met.

En doarbie, wat helpt die onderzuken? As vee vervoert de NS oons iedere dag van A noar Beter. Zie schat niet goed in hoe druk het wördt op betreffende datum en betreffend tiedstip. Zie hebt treinstellen te weinig. De rails met randapparatuur bent verolderd en goat vake kapot. Kortom: zie blieft mar onderzuken, mar zie doet d’r gin reet met.

Wie leaft in een land van controles. Öm an gegevens te komm’ hoalt wie de hele tied enquêtes. En doarnoa maakt wie verbetterplannen vöar op papier. En dan klopt het wear. Op papier. En töt de volgende controle.

Ik heb de onderzuker in de trein evroagd wat e deut en wrum.
“Wie scant jullie vervoersbewies.”
“Welke informatie haal ie doar of dan?”
“Wat vöar vervoersbewies ie hebt.”
“Wrum wul ie det weten dan?”
“…”
“En wat nog mear?”
“Woar ie in’estapt bent.”
“Mar as ule op de lijn Zwolle-Enschede íen kear een röndtje döar de trein maakt, gif det toch een heel beperkt beeld?”
“…”
“Kan de conducteur die info niet metnemm’ met zien röndtie?”
“Mar die löpp mar ien kear op zo’n rit döar de trein.”
“Ule toch ok?”
“…”
“En wat d’r mear van is, wie koopt al onze treinkaarten digitaal. Kan de NS via die weg niet alles wat ze weten wult an de weet komm’?”

Ik zeg teeng mien medepassagier: “En an zo’n enquête doe ie dus gewoon mee, schoap det ie d’r bent.”

Ik heb NS via twitter ok nog eam een reactie evroagd: “Ule doet al tien joar reizigersonderzuuk, hoe kan het dan det d’r zitplaatsen te weinig bent in de trein?” Gin antwoord ekreeng. Goh!

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.