Home / archiefcentraal / denne van knoldert het spiet mie

denne van knoldert het spiet mie

Hij had d’r al een kelder vol met stoane…

Zeg dan ok gin ‘allerhoogsten bedankt’, mar det bleek een opmerking woarmet ie iemand niet ‘allerhoogsten bedankt’, het bleek een vaststoande uutdrukking die ie koppelt an as ie iets kriegt. Net as een applaus an het eind van een speech, hoe slecht die op was.

As ie doar ien kear op gespitst bent, höar ie de hele dag van det soart opmerkingen öm oe hen. En det begint al met opstoane: goedemorgen! Gin meanse die oe met die groet een goede morgen wenst. ’t Is mear een vast ritueel, iets wat ie as earste teeng mekare zegt.

Standaardopmerkingen. ‘Werk ze’ as ie thuus weg goat. ‘Goedesmorgens’ as oe op kantoar komt. ‘Succes’ as ie – in mien geval – noar de collegezaal goat vöar lesse te gee’m. Ik hoppe tenminsten det det ‘succes’ een standaardopmerking is. Det ze het niet allenig teeng mie zegt…

’t Is nog niks gin lente, is ’t wel?
Och, det natte wear is goed vöar de tuin, za’k mar ze’ng.
Ja, zeg det wel. Mar ik heb gin tuin…

Smakelijk etten. Det is hillemoal gin wens det het etten lekker is, ie zollen de kwaliteiten van de kok d’r met in twiefel trekken. Nee, ‘smakelijk etten’ is völle mear het signaal van ‘begin mar’. ‘Aanvallen’ had ok ‘ekund.

‘Ja sorry, het spiet mie’, is ok zo iets.
Ik wol lest van mien tillefoonabonnement bie Telfort of. Bleek ik een joar opzegtermijn te he’mm. ‘Ja sorry, het spijt me’ zeiden ze. Det trök in twiefel. “Ie zit doar gewoon as ingehuurde kracht standaard antwoarden an mie te gee’m. Wat noe ‘sorry’, het spit oe hillemoal niet! Het kan oe gin donder schellen. Want as het oe speet, dan kun ie gerust de vöarwaarden anpassen.”

“Oke,” zei de andere kante van de tillefoon, “ie hebt met oe domme kop zelf det contract etekend, dus goa noe niet lopen zöaren det het an oons lig.”

Ik mut zeng, dan klinkt ‘sorry, het spijt me’, eigenlijk wel better.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.