Home / archiefcentraal / denne van knoldert denne

denne van knoldert denne

Ikke wel. En meestentieds heb ik een nacht later dan de teengoavergestelde dreum. Det giniene weet wie ik benne of det ik net heel domme fouten emaakt hebbe.

Dan dreum ik de iene nacht det ik de Mount Everest beklummen hebbe, öm de volgende nacht badend in het zweet wakker te wönn ömdet ik boam op die bult d’r achter kwam det ik heugtevrees had.

Of det ik met voetballen een breedtepass van links van de middenlijn op de rechter punt van zestien zo in ien kear uut de lucht hale öm met een volley oaver de keeper hen de kampioensgoal te dreumen. De uuthaal maken mie wakker ömdet ik in mien sloap écht een trapbeweaging maken. Een nacht later ging diezelde balle het stadion uut.

Vannacht had ik het ok nog: det ik op het podium van Ribs and Blues stunne vöar een uutzinnige menigte, ik weet noe al det ik vannacht wakker wörde van mien werkelijke saxofoon-talenten.

Ik heb al wel iens met zo’n professorpettie op, mien diploma op’ehaald. In een dreum. Een wekke later dreum’ ik det ik was bliem zitten.

In het echt oaverkump mie det ok soms. Toen ik vöar het earst op de lokale radio was leup ik noa het interview oaver stroate met het gevuul van ‘die hebt mie natuurlijk ollemoal ‘ehöard’. Ik mut nog steeds de earste reactie krieng van iene die mie höaren.

Of toen ik een neeje brille hadde. Ik leup bie Boertie noar buten en… d’r geböaren hillemoal niks.

Mar het tij keart.

Döar disse column goat steeds meer mensen mie kennen. Denk ik. Goa mar noa. Grote jongens as Freek de Jonge en Youp van ’t Hek hoeft allenig mar mear Youp en Freek te heten. Toen mien column nog allenig mar op Salland Centraal stund heetten ik Denne van Knöldert.

De kranten Salland Centraal en het Weekblad van Salland bent noe saams egoane töt het Weekblad vöar Salland Centraal en sindsdien heet ik in de kraante allenig nog mar mear Denne.

 Bliekbaar is det genog öm mie te kennen. Ik wache noe al een paar wekken op de teenggestelde dreum, mar die lik uut te blie’m.

Denne (van Knöldert)

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.