Home / archiefcentraal / denne van knoldert racefietse

denne van knoldert racefietse

‘De Holterberg mu’j zo’n earste tocht niet doene’, höar ik vake onder wielrenners. Mar ik trökke mie doar zundag niks van an. Achterof begriep ik de wiesheid: de leste kilometers van mien zestig kilometer-röndtie kreeg ik de pedalen niet mear rond. Begun ik nog met een kruus-snelheid van 33, de buren hebt mie de stroate terug in zien komm’ met krap an 26 kilometer per uur.

Toen pas scheut mie de earste rit van vöarig joar te binnen. Ok heldhaftig van start, ok de Holterberg, ok met kramp in de kuten thuus komm’.

Wat ok hetzelfde was as een joar terugge is det ik mie as wielrenner vogelvrie vule:

– Tegenliggers die nog snel een fietse inhaalt en allenig mar goed wear terugge op de eigen helft komt ömdat ik in de remme kniepe.
– Motorvolk det zich as Wil Hartog en Boet van Dulmen op de Luttenbergring waant en plat döar de bochte mien ideale lijn ofsnit.
– Wandelaars met lös lopende honden die mie dartel teeng de fietse op springt.
– Half op het fietspad geparkearde auto’s.
– Chauffeurs die op het vöarhoofd wiest ömdet ik niet op het recreatieve fietspad race (wat ok niet hoef).
– Olden van dagen op hun elektrische fietse die gin idee hebt hoe hard ze wel niet goat en oaveral völle sneller bint dan det ze d’r erg in hebt.

O nee, det leste is anders dan vöarig joar. Het bent niet allenig mear olden van dagen op die elektrische fietsen. Ik had de indruk det meansen op een gewone fietse sterk in de minderheid bent dit joar. Fietsenmaker, verkoop ie eigenlijk nog wel gewone fietsen?

– En ja, ik geef toe, wat d’r ok niet veranderd is ten opzichte van vöarig joar is het gedrag van de wielrenners zelf. As d’r van zo’n klein bierboeken-peloton ien schoap ienmoal oaver de dam is, dan kun ie d’r donder op z’eng det de rest d’r vanzelf achteran kump.

Mar het blif mooi det fietsen: lekker zacht windtie döar de hoare, het zachte gezoem oaver het asfalt, het schuurvrieje geratel van de tandwielties döar de derailleur…

Met de banden vol met wind, ik zol zeng, wie dut mie wat?

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.