Home / archiefcentraal / denne van knoldert puntie

denne van knoldert puntie

Mien goedkoopste hotel was ooit een kear op Vlieland. Öm de radiator van de douche een bittie op zien plekke te hoalen haa’n ze d’r een paar klinkers onder’elegd. Mar wat maken het uut. Wie waren de hele dag de hort op. En niemand die d’r zöaren det wie op de kamer met een elektrisch kokplaatie bespoaren op uut etten goane.

Mien duurste hotel was in Moskou. Op kosten van de baas natuurlijk. Keurig ontbijtje. Lekkere sappies in het restaurant. Mar eigenlijk deud niks in het hotel denken an Moskou. Det hotel had oaveral kun stoane. En echte Russische sappies as Morsch of wortelsap haa’n ze d’r niet. (Wodka wel, mar ja, det hebt ze dan eans aans ok wel wear.)

Het gekste hotel was in New York. Het Parker Hotel. Mooi op de hoek van Time Square. Det bleek bie Zoover te boek te stoane as het slechtste hotel van de hele wereld. D’r was ooit letterlijk een liek in de kaste ‘evunn en toe’egee’m, det maakt ’t d’r niet geliek gezelliger op. Mar het veul ollemoal best mee. D’r zaten wat verdachte vlekken op de mure bie het bedde. En het raam kon niet open terwijl de verwarming niet uut kon, mar wieders… Ik heb ok al ‘ns op de Annapurna in Nepal logeard dus ik weet det Zoover ongeliek hef.

Lest was ik in een hotel woar ze – as ik oaverdag weg wasse – altied, iedere dag wear opnieuw, de bedden kwamen opmaken, de handdoeken verschoonden en de zeepies verfrissen (die ik dan wear in de koffer stopp’m). Noa een paar dage veul het mie ok op det ze de wc-rolle iedere kear vrolijk maken. De uuteinden vouwen ze töt een puntie. Ik heb de rolle zelfs een kear ömmedreijt, det het papier langs de mure noar beneden mos. Mar nee, ’s oams hing e wear ‘goed’, met puntie en al…

Zie haa’n doar dus volk in dienst die op alle wc’s van det hotel (26 verdiepingen, 80 kamers per verdieping) iedere dag an alle wc-rollen een puntie vouwen. Wrum toch in hemelsnaam. Öm gedienstig te weane? Öm mie te plezieren?

Kan iemand mie det verklappen?

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.