Home / archiefcentraal / denne van knoldert liften

denne van knoldert liften

As student liften ik iedere vriedag van Enschede noar Hengelo. En toen ik later vöar mien werk kriskras döar de regio reed, nam ik zelf met liefde lifters met. Det was heel gewoon in die tied. Mar teengswoardig zie ie gin lifters mear.

As student verbleef ik döar de wekke in Enschede en vriedags liften ik dan noar RTV Oost in Hengelo woar een voetbalmoat werken. An de RTV Oost-bar drunken wie oons het weekend in, woarnoa ik gratis en vöar niks met mien moat noar huus kwam. Wel allebei met een borrel op, mar det moch toen nog gewoon.

As jongste werknemer crossen ik later met mien auto döar de regio en vöaral an het eind van de dag nam ik dan vake leerlingen uut de buurtdorpen met die niet met de fietse, mar liftend hen en wear noar schoele gingen. Det leaveren mooie verhalen op oaver schoelmeesters die vöaral bezig waren met regels handhaven in plaatsen van leerlingen dinge learen. Sommige dinge verandert nooit.

Teengwoardig kom ie die lifters niet mear teeng. Ik denk det det uut angst is. Gin angst bie de lifters, mar angst bie de chauffeurs die ze met mut nemm. Tja, as lifters gin lift mear kriegt, is de lol d’r gauw of.

Sinds van de wekke is het liften wear hillemoal terugge in mien lea’m. Mien va lift iedere dag. Sterker nog: twee kear per dag. ’s Mons de trappe of. ’s Middags de trappe op. In zien eigen huus. Ik heb het zelf ok een kear probeard: mooi werk.

Hier geldt ok: as het liften hapert, is de lol d’r snel of. En det deud het: de lift haperen. Halverwege, in het koale trappengat. Noe mut ie bedenken det iemand niet vöar de show een traplift nemt, dus doar zat mien va, keurig op het liftstuultie, wachtend op een monteur, die hem op de eindbestemming kon ofleaveren.

Wachen in det koale trappengat. Ie zollen d’r een longonstekking van krie’ng.

Het is ollemoal goed e’komm. Mar het plezier van liften is wel een stuk minder e’wönn. Onwilleköarig kreup het gevuul mien boek binnen van drie kwartier met de doem ömhoge stoane zonder det d’r iene stoppen. Tutdet de directeur van de schoele mie met nam. Öm het gesprek op gang te brengen vreug ik noar zien werk. As antwoard zetten hij de radio keihard.

Liften, het blif een gunst.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.