Home / archiefcentraal / denne van knoldert achterwerk

denne van knoldert achterwerk

Mannen mut protestearen as ze ziet det een andere man een vrouw een klap op haar achterwerk gif. Det vindt minister Jet Bussemaker. Toen ik det dit weekend in het neejs höaren scheuten mie drie dinge döar de kop.

1: Woar is zo’n minister de hele dag met bezig? Van Jet – mag ik Jet ze’ng? Of is det te intiem? – herinner ik mie nog hoe ze die twee Rembrandts an Frankriek verkwanselen. Die ‘twee zussies’ zollen zo regelrecht in het Rijksmuseum goan hangen. Ik weet de euforie nog: onder de bezielende leiding van D66 mos d’r 85 miljoen op toafel komm, wat ok geböard is. Mar zie hangt noe in het Louvre. Ik heb niet earder met emaakt det de landelijke journalistiek gewoon met de minister meedeud in de gelukzaligheid, terwijl het feitelijk een dik fiasco bleek.

Bussemaker vindt dus noe iets oaver klappen op achterwerken. ’t Meanse is d’r mar druk met.

2: Vrogger met de voetbal was ik ooit op een groot internationaal volleybaltoernooi (niet logisch inderdaad, mar d’r was bier) met in de oa’md een flinke disco in de feesttente. Oonze links buten hef de hele oamd meissies in de konte eknepen (ik zei al, d’r was bier) en as ze dan ömme keken, deud hij net of zien neuze bloeden.

Sorry minister Bussemaker, ik heb niet geprotesteard teeng die knieperieje. Dankzij de mooie vöarzetten van oonze wervelwind op de linker flank, mog ik mie an het eind van het seizoen steeds topscoarer numen. Zo’n man mut ie bevried hoalen! Nee, gin protest, sterker: ik had de slappe lach. (Had ik al ezegd det d’r bier was?)

3: Wat is det een raar woard: achterwerk. Toe egee’m: bips ik ok al zo wat. En konte is te plat. Mar ‘achterwerk’? Het gif mie het gevuul det ’t een lös zittend fenomeen is det an de achterkante van een vrouw vaste maakt is.

Een vrouw as bouwpakket. Vöargevel d’r an. Biepassend achterwerk uutzuken. Zörgen det d’r een gat in zit. En det geheel op een goed onderstel zetten. Met een bittie knutselkunst ben ie d’r ok zo nog een kear kloar met. En het mooie d’r van is det ie per onderdeel moatwerk kunt leavern.

Mar denk d’r ömme: ie mag d’r gin klap op gee’m en al hillemoal niet in kniepen. Det mag niet van de minister. Want die giet d’r oaver.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.