Home / archiefcentraal / denne van knoldert vrolijk deusie

denne van knoldert vrolijk deusie

Toen de NS de OV-chipkaarte bedach heb ik mie bevobbeld verdiept in hoe ze det in Duutsland en Amerika doet. Conclusie: bie de NS bent ze knettergek.

Toen bie mie de wichter gingen studearen heb ik bie mien moaten evroagd wat en hoe hun det financieel ondersteunen. Conclusie: de iene dut het links ömme, de ander rechts ömme, mar het doel is gelieke: zien det ie de wichter met zo weinig meugelijk kosten zo goed meugelijk verder helpt.

Toen ik tien joar terugge uut’elachen werd öm de anschaf van zonnepanelen, heb ik onderzöcht wrum d’r in Duutsland wél oaveral panelen op het dak laa’ng. Conclusie: Nederland subsidieert Shell en NAM, dan is zonne-energie al gauw duurder. Twidde conclusie: een minister kan noa zien carrière makkelijk wear an de slag. Bie Shell of NAM…

Toen het roken in cafés verboden werd, mar niet in cafés zonder personeel, ontdekken ik det zelfs Zimbabwe een strenger antirookbeleid had. En det ze in Tasmanië in 2010 een wet kreeng die roken vanaf oe 18de verbeud, terwijl die leaftied ieder joar een joar opschöf. Dus det iederiene van 18 joar in 2010 zien hele leam niet mag roken! Conclusie: onze antirookwet is slappe hap. Twidde conclusie: onze minister van gezondheid rookt zelf.

Ik leup lest döar de winkelstroate en kwam biegoande vrolijke foto teeng in de etalage. En toen bedach ik mie of d’r in Tasmanië ok iene zol weane die hun rookbeleid zol vergelieken met die van oons. Ik denk det die niet mear bie zol komm van het lachen. Wat een feestelijk vertoon, zo’n kissie met rookwaar. Mar ok wel wear droevig.

Öm de wereld in mien eigenste ömgeving better te snappen, kiek ik ok vake hoe de situatie van noe zich verhölt töt een joar of 25 terugge. Det zeg iets oaver de nabije toekomst. Ik denk det wie zelf dan ok öm det kissie lachen mut.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.