Home / Alge / denne van knoldert rituelen

denne van knoldert rituelen

Ik kwam d’r van de wekke achter det as ik mie vöarnemme öm ’s oams kort vöar det ik noar bedde goa, niet mear eam de koelkaste inspecteare op hoevölle kaas d’r nog is (en of doar nog wel een stukkie of kan), det ik dan vanzelf teeng een uur of achte in de oamd honger kriege.

Hoe gek is det! Ie sprekt met oe zelf of öm 23.00 uur niet mear wat te etten en dan krieg ie drie uur earder honger…

Ik ontdekken ok det ik een hele dag kan vergetten öm wat te etten, mar det as ik de stroate van thuus infietse, det ik dan honger kriege.

Toen ik op det soart dinge ginge letten kwam ik d’r ok achter det ik plotseling mutte poepen as ik ankomme op het werk. En ok as wie op zundagmiddag een stuk goat wandelen.

Wat is det vöar gekkigheid.

Ik kwam doar oaver an het denken toen ik lasse det Ludwig van Beethoven de beste muziek componearen as e op de kop ging stoane. En Glenn Goald het beste piano spöllen noa masturbearen zonder kloar te komm’. Ik vroage mie dan of hoe die mensen doar achter e komm bent. En of het bie mie werkt weet ik ok niet, want ik kan niet op de kop stoane.

In ‘dagelijkse rituelen’ van Mason Currey stiet gelukkig ok det ie niet de rituelen van anderen noa mut doene. Mar het is zo verkeard nog niet bie oe zelf op zuuk te goane noar gewoontes die oe anzet tut gedrag det ie graag vertoont of af en toe neudig hebt.

Onder het hardlopen wappert d’r altied creatieve gedachten mien heufd binnen dus toen ik lest zo ongevear een halve marathon bie mekare hobbelen, kreeg ik het geniale idee rituelen noar een ander eindresultaat te leiden.

Ingewikkeld? Ik zal het uutleng: de rituele nachtelijke koelkastinspectie leidt noar honger öm 20.00 uur, mar ik goa mie vöarstellen det det juust leidt töt better sloapen. Nou een tiedje krieg ik dan niet mear öm 20.00 uur honger, mar ik sloap wel better!

Volgens mie kunt ze doar in de verslavingszorg wel wat met. Det de associatie van ‘einde werkdag’ niet noar ‘borrel’ leidt, mar noar ‘een lekker lange actieve oamd’. En diëtisten, lear dikke mensen hun ritueel zo veranderen det hun gedachten niet iedere kear de frituurpanne inlöp mar het bos.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.