Home / archiefcentraal / denne van knoldert hoge heren

denne van knoldert hoge heren

Toen ik zundag met mien börd op schoot noar Studio Sport keek, wönn’ ik van het iene op het andere moment kwoad. Niet op het slechte theater van de voetballers, niet op het IQ van de supporters, mar op de hoge heren rondom de sport.

ADO – Ajax was net of’elopen en d’r mos uutleg komm’ vöar de oerwoudgeluden. As Riechedly Bazoer an de balle kwam, deed een deel van de ADO-anhang een aap noa.

Noe denk ik zo mar det die supporters gin racisten bent. Althans, ik denke niet det d’r een relatie is tussen die twee dinge. Volgens mie denkt die supporters det ze grappig bent. Ik denke det ze Ajax en Bazoer uut hun ritme probearen te halen. Ik denk ok det die supporters op schoele niet zo heel goed op’let hebt. En ik denk det ie in groepsverband andere dinge doet. Anders dan anders en anders dan oe zelf (net as ‘Keulen’ gin vluchtelingenprobleem mar een groepsprobleem is).

Vervolgens mochen de trainers van ADO en Ajax ze’ng wat ze d’r van vu’nn. En de scheidsrechter ok. Mar die goat d’r ollemoal niet oaver. En det zei’en ze dan ok: “Wule goat doar niet oaver!”

Nee, de baas van ADO giet d’r oaver. En die baas beslist in oaverleg met de burgemeester, die wear de baas van de politie is. En op det punt wönn ik kwoad. De hoge heren wollen niks ze’ng. Zie haa’n een persvöarlichter een stuk papier in de haa’ne gee’m die vöar volk en vaderland mos ze’ng det ze het hele geböaren later nog ‘ns goat controlearen. Ofwel: toen die oerwoudgeluden klunken hadden de stropdassen niet de ballen op te treden.

Hoevölle majo ik ok op mien patat met frikadel deude, ik krege de smaak niet mear te pakken. Volgens mie was doar zundag in det ADO-stadion op zien allerbest te ziene wrum of dinge zo fout kunt goane vandage de dag. De hele wereld wördt met regels in het pak ‘estökken, iederiene wörd onderwörpen an controlemechanismen. Behalve de heren die de regels bedenkt en de controles uutvoert. Die leaft in een andere wereld dan de rest. Die doet wat hun goeddunkst, die wördt döar niks en niemand controleard.

En zie komt d’r iedere kear met weg. Want zie hebt ok de klassejustitie bedacht en in hun macht…

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.