Home / archiefcentraal / denne van knoldert koffie

denne van knoldert koffie

“Wule bent niet zo van de laptops. Wie wult graag det klanten maximaal geniet van oons zorgvuldig gezette köppie koffie.” Ik zit völ te vrog vöar mien ofspraak in Groningen in een café en wol de tied doden op internet.

Mar die vlieger ging niet. Of ik de laptop dichte wolle doene. “As ik det eweten hadde, was ik in een ander café goan zitten”, leg ik de ober-eigenaar uut as die mien dubbele espresso brengt. “Det mag, dan nem ik de koffie wear met terugge.” Jaha, dan kan ik wel Denne van Knöldert heten, mar dan zeg ik toch niet van ‘stik d’r mar in’. Ik heb mie vermand en ben andere dinge goan doene. Krantje ‘epakt. Bittie lustervinken bie de buren. En noar de kroegbaas lusteren die iederiene deelgenoot maken van zien koffie-manie.

Mien ofspraak (nota bene oaver journalistiek op internet) was ok nog te late. Töt oavermaat van ramp, zol ik vöarof edacht he’mm. Mar de computer-alternatieven waren eigenlijk best wel leuk.

An de buurtoafel zat Jochem Uiterhagen, ie weet wel, die schaatser uut de tied woar van iedere wielrenner al wél bekend is det e doping gebruken. Jochem wol sterker spul dan vrogger en kreeg van de cafébaas ‘ongepelde Etiopische koffiebonen’ as advies. Noe was ik toevallig ooit in Addis Abeba en maken doar iedere dag – gewoon op stroate – de mooiste koffie-opschenk-ceremonies mee, vanof het branden en fijnstampen van de koffieboon töt het aromatische opgieten. Het heerlijke opdrinken deu’n ze doar gerust terwijl ze met hun tillefoon op internet zaten… Det zei ik teeng de kroegbaas en die was kort in zien antwoard: “Geleuf ik niet!” Nee, as ie nooit ‘ns op internet zit, dan geleuf ie misschien ok niet det wie noar de moane kunt vlie’ng, dach ik stiekem in mie zelf.

Ik heb mie het Dagblad van het Noorden d’r mar ‘ns bie’epakt öm te kieken of ik op die maniere een bittie vertier kon krieng. Asof de duvel met keek, las ik det KPN van plan is sneller internet noar het platteland te brengen. Wel op de boerderieje, niet hier in dit Groningse café.

Mar ik mut toegee’m, goandeweg kwam ik wel töt rust. Het gevuul van ‘nog eam snel die mail beantwoarden’ veranderen in ‘die mail kan ik mo’nn ok nog wel beantwoarden’. Ik ging natuurlijk ok bewust mien dubbele espresso pruu’m. En weet ie, dan is koffie eigenlijk hillemoal niet zo lekker…

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.