Home / archiefcentraal / denne van knoldert poezenvoer

denne van knoldert poezenvoer

“De wandel- en fietstoeristen wördt hier ieder joar een joar oalder”, zei de fietsenmaker van het dorp die metiene een hele reisorganisatie öm zien bedrief hen ebouwd had. Hij regelt vluchten, is goeie vriendies met de plaatselijke hotelbaas en verhuurt zien fietsen vöar tochten op Rhodos.

Wandelen en fietsen op vakantie, het trekt speciaal volk. Iets hoger opgeleid en behoarlijk in de slappe was. Gin verkeard volk öm oe fietsen an de verhuren, behalve dan as d’r iets is met die fietse: want denkvolk kan det mar zelden zelf reparearen.

Wie kwamen bie de fietsenmaker drie hoogdenkende vrouwen van rond de 60 teeng. Het waren rechters die gezamenlijk ‘de zinnen even verzetten’. Zie haa’n net het hele eiland rondömme ‘efietst en zollen een dag later wear huuswaards. Zie waren intens tevreane oaver alles wat ze enzene haa’n en oaver alles wat ze met e’maakt haa’n. Mar ien ding zat ze nog dwars: det kleine zwart-witte poesie.

Ik zeg “det kleine zwerfkattie det de hele tied öm etten löpp te schooieren?”
Ja, die ja.

Zie waren het dorp nog eam in ewest vöar poezenvoer, mar det was nergens te koop. Hoger opgeleid volk zol doar – denk ik dan – conclusies uut munn trekken: gin kattenvoer? Dan is het vermoedelijk niet gebrukelijk katten te voeren. Of: zol kattenvoer een uut de hand gelopen hobby weane uut de oavervolle portemonnee van het rieke westen, woar vöar vluchtelingen gin plekke is, mar woar de katten wel twee kear daags iets te etten kriegt?

“Zonder voer gaat dat beestje het niet redden”, hadden de gelearde fietsdames onderling bedacht. “Hij is al zo mager. En hij heeft ook maar een oog! Als wij morgen weg zijn en jullie vinden nog ergens poezenvoer, willen jullie hem dan bijvoeren?”

Met een ‘ja hoor’ had ik hun toch al goeie vakantie perfect ‘emaakt. Met een ‘geen denken aan’ was die vakantie an gruzelementen. Dus ik keus vöar de tussenweg: “Komt u uit de stad?”

Det snappen ze niet. Ik zeg: “nou, buten de stad geldt Darwins oaverleavingstheorie. De sterksten blieft oaver, det kump het ras ten goede. Is iets met evolutie. Doar hebt ule toch wel van ehöard?”

Ja, mar det was theorie. “In de praktijk pakt dat soms wat anders uit. Dan doet de emotie ook mee.” Zie mossen d’r zowat van lippen. Ik zeg: “Mooie rechters bent ule. Komt verdachten doar ok met vot?”

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.