Home / archiefcentraal / denne van knoldert app

denne van knoldert app

Moe sturen de wichter noar schoele en de kjel noar ’t wark met ollemoal wat stoete in ’t trömmeltie.

As ze mie vroagt of ik een zinnegie in het plat wulle zeng öm te höaren of ze mie snapt, doe ik altied iets met kjel, wichter en stoete. En döarumme mos ik ok an die zinne denken, toen ik las oaver een groot onderzuuk noar oons en andermans dialect. Det onderzuuk is van het grootste belang want zeg ie noe patat of friet. Is het pöaltie of pössie. Viere of veare? Belanghebbende zaken woar ze in de commissie stiekem misschien al wel ‘ns eproat hebt. Ie weet het niet.

Het onderzuuk is ingenieus. D’r is een app gelanceard met ollemoal spellegies. As ie an die spellegies met doet, leaver ie vanzelf input vöar de wetenschappers. Zo kun ie bevobbeld zinnegies inproaten. As Erben Wennemars of Mark Tuitert zoiets dut, klinkt det heel anders dan wannear ie Johan Flemmings an het woard loat. De wetenschappers kunt doar dan iets met. Det Wennemars uut Dalfsen kump bevobbeld. Zie schient straks ok te ontdekken det een Nederlandse Marokkaan uut Groningen anders pröt dan een Nederlandse Marokkaan uut Deaventer.

Heel nuttig.

Vöaral ok ömdet ie een app neudig hebt vöar die spellegies. En een app kan allenig mar op een smartphone. Ik zie de doelgroep wegdrie’m van het doel. Want wie pröt d’r plat? En wie hef d’r een smartphone en is handig met apps? Precies, det is niet per definitie het zelfde volk. Sterker: det is per definitie ander volk.

Jammer.

Mar het onderzuuk kump d’r wel. Want d’r is geld vöar. En de techniek maakt het mogelijk. “Och”, zegt de onderzukers, “meestal is d’r wel een kind of kleinkind met een smartphone.” Ja, precies. Mar det is nog heel wat anders as det kind of kleinkind met die smartphone én de app met olders of opa en oma spellegies giet doene.

Hoe verre lig die wereld wel niet uut mekare. Ik durf te wedden det de platproatende doelgroep in disse column al ofhaakt op woarden as smartphone en app. Toen mien dochter an mien olders uutleng wulk knöppie ze op de mobiele tillefoon mossen indrukken vöar het tillefoonboek, zei mien va: “Mar een tillefoonboek, det past toch niet in zo’n kleine tillefoon?” Van die dingen.

Succes met het onderzuuk. In mei mut de earste resultaten al bekend weane. Ik ben beneejd.

Denne van Knöldert

Lees ook

VVD wil einde aan overlast op Vechtdallijn

OMMEN – Intimidatie, spugen, geweld en ander ongewenst gedrag. Al jaren is het schering en …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.