Home / archiefcentraal / denne van knoldert wegwiezers

denne van knoldert wegwiezers

As ik bie mie in het dorp rond lope, kan ik mie doar alles bie vöarstellen. Tut onder an de kerke stiet een börd woar as of ik de kerke kanne vinn. Niet det ik doar völle noar op zuuk benne, mar toch. En in het butengebied is d’r gin ofslag mear te vinn zonder van die korte pöalties met pielen vöar een wandelroute d’r op.

As ie wel ’ns in België of in Duutsland fietst, herken ie gelieke de oaverdaad an bewegwiezering in Nederland. In het butenland kump het gebrek doar an, oaver as ‘lastig’. Mar as ik in Nederland de discussies zie bie paddestoelen en platttegronden van fietsknooppunten, dan weet ik zo net nog nie hoe handig het systeem van oons is. Het lik doar soms wel de vergadering van de olderenbond.

Ome Hein hef doar een goed middel teeng evunn. Hij fietst gewoon lukraak wat rond, slöt ieder weggetie in wat ‘m mooi lik en zien ienige kompas is zien mage. As e honger krig zög e zich zo’n knooppuntenroutebörd en kik hoe e wear op huus an kan, woar tante Gerda dan een lekker möaltie uut eigen tuin kloar hef stoane. (De mage van ome Hein én de weg noar huus werkt niet altied eam zuver, woardöar soms det lekkere möaltie ok al wel wat langer stiet te wachen, mar een knies-oar die doar op let.)

Zal mie benieuwen hoe lange het nog duurt vöardet alle wegwiezers in ons land weg bent. As ik wandel gebruuk ik een GPS die mie op twee meter kan zeng woar ik lope en woar de ofslagen bent. Ok midden in het bos, willekeurig welk bos! Fietsen kriegt al een display op het stuur die werkt als de TomTom in de auto. Het is allenig nog wachen op det de ome Heins van disse wereld d’r met oaverweg kunt.

En het is natuurlijk een kwestie van tied of die digitale systemen geeft ok an woar de winkels, cafés en restaurants bent. En inderdaad woar ik die toeristische kerke kanne vinn. “Daar staat u onder”, krieg ik dan as info.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.