Disse kear mut d’r zand van de wettering an de iene kaante van het fietspad noar de andere kaante. Wat wel vreemd is, want een half joar elene mos precies detzelfde zand aans-ömme van de andere kaante noar woar het noe – bliekbaar toch niet goed – lig.
Öm de berm te beschermen hebt ze van die grote staalplaten langs het fietspad elegd. Öm die doar te krieng mos een grote machine het fietspad een heel eind op. En doarbie hef e de berm behoarlijk kapot ‘erene.
En öm fietsers te waarschuwen vöar de gladheid op het fietspad woaroaver det zand wear terugge noar zien earste bestemming giet, bent d’r waarschuwingsbörden near ezet. Ik vind det driehoeksbörd met twee slingerende strepen en een auto d’r op heel mooi. Hoe eenvoudig kun ie vöar gladheid waarschuwen. Ok as ie niks van verkearsbörden weet, begriep ie det in ien oogopslag.
Mar toch… Wie hebt het hier oaver een fietspad. Een recreatief fietspad. Brommers bent d’r dus verboden. Wat d’r langs kump bent fietsers en scootmobielachtige dinge. As het vöar die weggebrukers glad is, mut ie ofvroa’ng of zo’n börd teeng slipgevaar het beste is. Ik advisear ‘Afstappen wegens gladheid’. Det past mear bie dit langzame verkear.
Mar ja, zollen die verkeasrsbörden d’r stoane vanuut een waarschuwing, of ömdet de verzekering de schade niet dekt zónder die börden. Ik heb het idee van det leste. En det heb ik bie mear verkearsbörden bie wegwerkzaamheden. Hullie van het wegwerk bent verplicht d’r wat börden near te zetten mar ‘hoe en wat’ zal ze een zörge weane.
Wrum of ik det in dit specifieke geval ok denke? Het werkvolk gif namelijk ok een snelheidsadvies: Maximaal dertig kilometer per uur. Ten earste werkt ze in een bochte woar ik met de racefietse niet harder dan 15 durve. Ten twidde sjouwt ze det zand oaver een recreatief fietspad. Met een maximum snelheid van dertig kilometer per uur.
Zulke dingen geböart ömdet wie werkt vanuut regels en controle doarop. Zelf ea’m noadenken oaver de beste oplossing is al lange uut ons denksysteem weggebureaucratiseart.
Denne van Knöldert