Home / archiefcentraal / denne van knoldert causaal

denne van knoldert causaal

‘Wear een bewies det beroemd weane niks vöarstelt’ schreef iemand op facebook noadet Joost Zwagerman uut zien ondraaglijke lea’m estapt was. Gevolg van zien depressie.

Noa bakken van kritiek op die domme opmerking trök de facebooker (die met een bittie pech bie de leste verkiezingen zo mar in een gemeenteroad terechte was e’komm) de köttel niet in, mar zöch e de tee’ng-anval met det Zwagerman zelf ezegd had det zien dokter hem rustiger werk anreud mar det hij niet zonder de kick kon. En ok det het aantal zelfdodingen onder beroemde mensen hoger is dan onder niet beroemde mensen.

Ik mos denken an correlatie en causaliteit. Het kan weane det beroemde mensen mear zelfdoding pleegt, mar det wul nog niet zeng det beroemd weane zelf de oarzaak is. Ik vermoed det mensen met grotere kans op zelfdoding ok een grotere kans op beroemd weane hebt.

Ik kan mie vöarstellen det theatraal gedrag ten grondslag lig an beiden. De lijn van theatraal gedrag noar beroemd én zelfdoding is dan causaal. De lijn van beroemd noar zelfdoding is correlatie.

Klinkt ingewikkeld, mar het is wel belangrijk in zuver redeneren. Zo is joaren edacht det sloapen met het licht an nachtblindheid veroarzaakt. Kinderen die ’s nachts het licht anhadden, waren namelijk völle vaker nachtblind.

Het hef nog heel lange ‘eduurd vöardet ‘ze’ in de smiezen kree’ng det ‘lampe an’ en ‘nachtblind ‘een correlatie was en gin causaliteit. Wat was d’r an de hand namelijk? Olders die nachtblind waren, leuten het licht op de sloapkamer van hun kinderen an as ze noa het welterusten zeng zachies de kamer verleuten, ömdet ze anders oaveral teeng an stoeken en dan waren de wichter wear wakker.

Det de kinderen van juust die olders nachtblind bleken, had te maken met erfelijkheid. Nachtblindheid bleek erfelijk.

Politici doet det vake ok slecht. Spa Rood en vruchtensap kriegt sinds prinsjesdag eam völle BTW (en wördt dus duurder) as cola en sinas öm mear geld in de staatskas te krieng. Mar de werkelijkheid giet anders wönn. De kans op minder gezond (sapjes) en mear ongezond (cola) drinken nemt toe, dus de kans op ziekte (oavergewicht, diabetes) nemt dan ok toe. En det is duurder.

Noe zal de echte onderzuker zeng det det vöarbeeld niks met causaliteit en correlatie te maken hef. Klopt. Mar ik wol het wel eam ezegd he’mm.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.