Home / archiefcentraal / denne van knoldert misofonie

denne van knoldert misofonie

Ik zag bie Studio Tour een toafel met 8000 calorieën an etten. Stoete, kaas, eieren, jams, melk, jus d’orange, appels, macaroni, riest, bananen, koekies, gels, enzovoort, enzovoort. Een Noorse journalist hef probeard det achter mekare op te etten, mar hij mos halverwege oaver de nekke.

En toch is 8000 calorieën detgene wat een ‘renner in koers’ per dag noar binnen werkt. Völle? Ik vroage mie mear of wat een lawaai det mut gee’m as zo’n ploeg met mekare an toafel zit. Ik kan doar niet teeng, teeng het geluud det mensen maakt met etten. Tjonge jonge, wat een lawaai det sommigen maakt.

Thuus had ik mie vöar’enömm niks te zengen van die et-geluden, terwijl ik d’r toch best vake last van hebbe. Vöaral in de weekenden as de studenten van de familie thuus komt uutrusten en ansterken. D’r wördt dan langzaam en völle ‘egetten. ’t Is geen smakken, ’t is mear een constant gemaal van voeding tussen de kiezen. Op een gegeven moment kan ik mie niet mear concentrearen op de gesprekken, het ienige geluud det dan nog binnenkump, is van die maalderieje.

‘Niks van zeng, niks van zeng’ prent ik mie dan in, töt det ien van de wichter vreug of ik wat minder lawaai wol maken. “En ieje dan?” wol ik d’r uutflappen, mar ik probeare niet an det soart jij-bakken te doene. In plaatsen doarvan ben ik goan google-en op ‘last van et-geluden van een ander’. Nou, det bleek dus een ziekte met een eigen name: misofonie.

Noast misofonie hebt mensen ok last van rommel van een ander (en ziet hun eigen rommel niet), last van andermans luchies (van wc-geur en zweetlucht töt goedbedoelde mar mislukte deodorants) en last van andermans met de tonge tussen de taane vandan halen van ettensressies.

Ik kon allenig mar concludearen det det klopt. Ik heb van al die dinge last.

Van misofonie kun ie ofkomm’. Dan mut ie noar een therapeut. Dan kost het geld. Ie kunt oe d’r ok gewoon niet mear an ergeren. Det is gratis.

Mar ik wul hillemoal niet van misofonie of. Het blik namelijk een ofwieking te weane die völle vöarkump bie geniaal creatieve mensen. Zulke mensen ziet en höart alles öm zich hen. Ok etgeluden dus. Nou, en det wul ik zo hoalen, want zo ontstoat mien columns!

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.