Home / archiefcentraal / denne van knoldert huppelen

denne van knoldert huppelen

Mien oalders vu’nn det mien columns soms völ te muuilijk waren. Zie snappen het lange altied niet mear. Ömdet ik d’r iene van oplossingen benne, heb ik ze uut’elegd hoe ik werk met doelgroepen, mar ik ben zundag ok eam langs egoane öm te höaren woar as of hunnie dan oaverdag zoal oaver proat.

Oaver die doelgroep: ik probeare mien publiek te verjongen öm te vöarkommen det mien leazerspubliek gelieke tred krig met het abonnee-aantal van de Stentor. Det schient gelieke te weane an het sterftecijfer. Niemand nemt van onderop een neej abonnement en van boamof goat ze dood. Mien oalders bent det leste nog lange nie van plan, mar zoas de notaris zei toen ik een samenlevingscontract met mien vriendinne sleut: die dinge mut ie regelen as het nog goed giet.

Dan de onderwerpen. ”Hoe kan een reangmeter noe angee’m hoevölle reang d’r is e vallen, terwijl det ding taps toelöpp”, wollen ze weten. Doaroaver volgende wekke mear. Mar völle ingewikkelder was de vroage wrum asof die kraaien op het grösveldtie vöar het huus de iene kear huppelt en de andere kear loopt.

“Vroag het ze zelf”, reud ik mien va an.

“Mar ik kan nie zo goed mear lopen”, was zien antwoard.

“Dan deel ik de vroage wel via Twitter en Facebook”, stellen ik vöar.

“Kiek, doar goa’j wear muuilijk lopen doene”, zei mien moe.

‘Ik zit hier bie mien oalders en die vroagt zich of wrum of de iene kraaije huppelt en de andere kraaije löpp’ slingeren ik as tweet de wereld in. En ik kreeg snel antwoard.

“Weet ie zeker det ie bie oe oale luu zit?” vreug een moat, die dudelijk noar een pöttie biljarten an het hengelen was.

“Een kraaie kan lopen én huppelen”, verwees iemand mie noar een reportage op RTV Rijnmond. “Lopen is makkelijker en kost minder energie. Mar as een kraaije zich vot mut maken vöar een auto of hij wul van takke noar takke, dan is huppelen wel zo handig.

Mar het mooiste antwoard kreeg ik van mien Facebookvriendinne Antoinette: “Die huppelende kraai is gewoon verliefd op die lopende kraai.”

Det kon zo nog mar iens het meest woar weane!

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.