Home / archiefcentraal / denne van knoldert ijscodieven

denne van knoldert ijscodieven

Ik heb thuus bie ’t Natuurlijk Huus een rustpunt en doar bent de ofgelopen wekken negentien, ja negentien, ijssies egapt. Vermoedelijke daders: blanke etterköppies uut de brugklasse die vanof Roalte bekeken richting Heino-Lemelerveld woont. Die kunt in het vervolg better een stukkie ömme fietsen…

Ik schrief disse column öm mien earste agressie wat te bekoelen, öm te vöarkommen det as ik ze betrappe det de politie d’r dan bie ehaald wördt wegens diefstal in plaatsen van wegens mishandeling.

Ik twiefelen ok an disse column ömdet ik nie zo van de wraak benne. Mar Mark Rutte brach mie op andere gedachten. Hij sprak vöarige wekke van de ‘dikke-ik’-mentaliteit van Nederlanders, det det of elopen mos weane. Noe hef hij as VVD’er niet völle recht van sprekken, mar ik deel zien mening.

Hier hebbe wie te maken met blanke jeugd die mie het rustpunt löaggapt. Net as de politie op Burgernet dut volgt hier een signalement van de vermoedelijke daders. Het is een drietal. Blanke klootjochies in de leaftied van 12, 13 joar. Twee maal strotouw-blond hoar. Een kear iets donkerblonder, die is ok een stuk kleiner en draagt een bril met blauw montuur en rechthoekige glazen.

Ik sprak ze an toen ik op weg noar huus de jongens langs het fietspad mien ijssies zagge etten. Ja, nee, zie hadden netties betaald. Mar toen ik thuus de kas controlearen, bleken ze mie vöar e’löang te he’mm. “We hebben laatst zelfs een tientje in het trommeltje gedaan”, zei de grootste kloothommel. Woarmee het zelfs diefstal met vöarbedachte rade bleek, zie hadden het reddingsverhaal al kloar.

Toen ik noa mien ontdekking terugge het fietspad ofreed, waren de jongens weg. Zie hadden de (löage) ijsbakkies in de berm achter ‘eloaten.

Ik doe bie dissent een oproep an hun oalders. Herkent ule oe zoon in boavenstoand signalement, zörg dan det de ijssies asnog betaald wördt. Ik doe ok een oproep an aanderen die de drie jongens kent: zegt het voort.

Zolange de ijssies niet betaald bent, advisear ik betreffende jongens niet mear oaver het fietspad langs ons huus te riene, want ik ben töt alles in stoat. Het is van tweeën iene: of ule betaalt de schade (en die is mear dan de dagwaarde van het gestolen ijs). Of ule fietst de rest van oe middelbare schoele met een grote ömweg noar huus. Anders bent ule an de böarte.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.