Home / archiefcentraal / denne van knoldert fair play

denne van knoldert fair play

‘D’r is gin meanse earlijk’, zeg een goeie kennis van mie altied, ‘en as ze zegt det ze wel earlijk bent, dan liegt ze! As ie zuver op de groat wult weane, lacht ze oe achter de rugge uut, dus det kun ie better mar niet wullen weane…’.

Die kennis is Eaglesfan en zien kluppie hef noe de fair play-cup ewunn en mag Europa in.

Het is inderdaad wel een bittie öm te lachen. Eagles Europa in. Loat ze earst mar ‘ns zörgen det ze in de eredivisie blieft. Een bittie as toen Glanerbrug kabeltillevisie kreeg. “Wannear het riool an ‘elegd wördt, wete wie nog niet”, zei Herman Finkers doaroaver.

Ik mos ok denken an die bouwvakker die het een student kwoalijk nam det e een fietse terugge stal noadet zien stalen ros ok e’gapt was. Die bouwvakker ging op zoaterdag beunen en bestal de belasting op die maniere vöar minstens de wearde van een fietse. Mar det was heel wat anders.

Fair play, wat koop ie doar vöar? Gin punten in de eredivisie bliekbaar. Ik zatte zundag noar de meiden van Sercodak Dalfsen te kieken. Toen die Amsterdamse VOC-teengstander nare oavertredingen begun te maken in de twitte helfte, klappen ze d’r vanof Dalfsen kaante eam flink hard op. Niks gin fair play, mar een uutstraling van ‘blief met oe smearige ellebogen van mie of, anders krab ik oe de oong uut de kop’. En hoppa, vöar de viefde kear landskampioen.

PvdA en VVD probearen ofgelopen weekend ok in anmerking te komm’ vöar de fair play-pries. Hopeloos, want politici en fair play, doar geleuft ze allenig zelf mar in. Mar toch: zie reupen onze minister van volksgezondheid op ok dure medicijnen an kankerpatiënten te gee’m as ze doar mear geneeskans döar zollen he’mm. Mar het giet de politiek niet öm die patiënten, het is hunnie te doene öm zielties, stemmetjes, zetelties.

Want anders waren ze de kankerbestrijding wel vöaran begunn. Met rookgerei achter de rugge van de caissière te verbieden, met drank uut de supermarkt te bannen, met unilever te verplichten een gezonder soart van etten uut hun fabrieken te loaten komm’ en gif in de landbouw te verbieden. Mar det doet ze niet. Het kan ok nog ‘ns een kear te völle fair play weane.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.