Home / archiefcentraal / denne van knoldert controle

denne van knoldert controle

As oe de boekholder giet lopen met 8 miljoen euro, dan heb ie een probleem. Het Leger des Heils oaverkwaamp det. Toen de man ziek werd, kwam een vervanger d’r achter. As het oe niet opvalt det ie in de bedrijfsvoering 8 miljoen euro mist, dan mut ie wel heel goed geleuvig weane. Of stinkend rieke.

Lastig, een boekholder heb ie in dienst um te controlearen wat d’r in en uut giet. De boekholder wördt gecontroleard döar een accountant. En die wear döar de belastingen. En dan nog was niemand det van die 8 miljoen op’evallen.

Hoe losse wie det op? Nog een controlearende loage d’r bie? Of stoppen met controlearen!

De onderwiesbond constateart det de werkdruk op schoelen onaanvaardbaar hoge is kort vöardet de inspectie op bezuuk kump. Leidt det noar onaanvaardbaar hoge controle-eisen of noar de constatearing det die schoelen zonder controle niet doet wat ze mut doene? Mag ik de inspectie vertrouwen op kwaliteit? Of mut de inspectie ok gecontroleard wö’nn?

As íen co-piloot íen kear een döare van binnen uit vergrendelt, mut dan alle 100.000den vliegtugen van de een op de andere dag minimaal twee mensen in de cockpit he’mm? Of is het better de döare niet te vergrendelen? Wie controleart een co-piloot eigenlijk? En wie controleart de man die hem controleart?

Een controleur hef macht. En macht corrumpeert.

Kan de wereld eigenlijk niet met wat minder controle? Loat iederiene zelf zien verantwoardelijkheid ne’mm! In Ommen stoat 350 (tien procent) oaverbodige verkearsbörden. Met míen definitie van ‘oaverbodig’ kan het denk ik met nog wel 2000 börden minder. Woaronder verkearslichten. Oaverstekken as d’r niks an kump, kon wel ‘ns veiliger weane dan döar gruun riene…

En persoonlijk vertrouw ik mear op een learkracht dan op de inspecteur. De learkracht wul namelijk het beste vöar zien leerlingen. De inspecteur wul allenig mar det alles goed op papier stiet. Een learkracht hef namelijk te maken met olders van zien leerlingen. Een inspecteur hef te maken met de instantie die hém controleart.

De wereld van de drugs bewis mien geliek. Alcohol hoeve wie niet illegaal te stoken, dus hoef de politie det ok niet te controlaeren. Mar hennep mag niet, twee derde van het politiewerk hef met det verbod te maken. Geef het net as as alcohol vrie, stop de controle.

Mar wrum doede wie det dan niet zo? Ömdet wie mekare niet vertrouwt.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.