Home / archiefcentraal / denne van knoldert scheetje

denne van knoldert scheetje

“Kost wel een hoop, zo’n windmolen”, zei d’r iene in de proat-sauna.

“Ja, mar binnen tien joar verdient e zien geld terugge”, antwoarden een andere zwetert.

“En de wind giet nooit op”, zei nummer 3.

Nummer 4 deud ok een cent in het bakkie: “As ze noe mear subsidie geeft op zonnepanelen, hebbe wie die öllie niet mear neudig. Det is schoner, mar dan bent wie metiene van al die oarlogen of. En van de aardbevingen in Groningen.”

Binnen was het 85 groaden. Echt een temperatuur öm het te he’mm oaver de energievöarroad van de wereld… “Kiek die lekkere wind noe weijen” wees nummer 1 döar het raam noar het herfstwear buten, “gratis wind, gratis energie.” Mar buten zagen wie noast woei in de bomen ok een jonge meid zich ofdreung. Die kon niet noar het donkerder binnen kieken en had gin idee det wie wel goed noar buten konnen kieken. “Ja, doar krieg ik noe ok energie van”, zei nummer 2.

Noa een verkoelend dompelbad zöch ik mie op het ‘wellness’-complex een ofgelegen sauna, gestookt op holt. Binnen in het schemerdonker bleek ik de ienige bezuker en ik vund mie een plaatsie buten de zwakke lichtbundels. Een rare ervaring, op een heel groot saunacomplex zo mar op een donderdagoamd een sauna hillemoal vöar mie allenig.

Mar niet vöar lange. Iniens kump doar een – ik vermoed – gepensioneerd echtpaar binnenlopen woarvan de vrouw bie het opensloane van de döare gelieke lawaaiig begun te roepen hoe heerlijk, zalig en perfect ze disse sauna toch vund. Weg rust. En toen leut ze d’r ok nog een enorme scheet bie.

“Ach”, zei ze teeng haar man, “det heb ik noe de leste tied altied. Dan kump d’r zo mar lucht uut. Uut det middelste gaatie.” Ik kuchen een kear. Misschien haa’n ze mie niet op’emerkt. Earst bie binnenkomst met lawaai de ruumte in beslag nemm, vervolgens met een scheet in mien comfortzone komm’ en dan ok nog uutleng woar die scheet van dan kwam. Ik kuchen nog een kear extra hard.

Mar het werken niet. De vrouw ging gewoon verder: “Tja, ik kan d’r niks an doene. Een scheetje uit mijn vagina. Raar.”

Ja. Raar.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.