Home / archiefcentraal / denne van knoldert vertrouwen

denne van knoldert vertrouwen

Earst waren d’r gin regels. Mar toen wie mekare niet mear gingen vertrouwen, wönn d’r regels bedacht. Det begun al bie de Neanderthalers. Toen Annie niet kon he’mm det Jan ok met Truus achter de rotsen stiekeme dingen deud, toen is het instituut ‘trouwen’ vermoedelijk bedacht.

En doarnoa nog völle mear regels. Wie raakt d’r nooit mear of, ömdet mensen hun geld verdient met handhaven.

Mooi leamsdoel: handhaven van onzin.

Ik had vöarige wekke de auto ergens geparkeard woar het – noar achterof bleek – niet moch. Bie Saxion in Deamter, hillemoal achterof op een zandvlakte woar gin vakken in’etekend stoat en woar iederiene ieder gaatie benut, op zo’n maniere det een ander d’r nog wel uut mut kunn’, tenminsten as die ander wèl een knap stukkie auto riene kan, want de oavergebleven ruumte is schaars.

En doar ridt dan op gepaste tieden een handhaver rond. En die zag dus mien auto stoane bie een hekke met ‘uitrit vrijhouden’. Det had ik keurig edoane: het hekke kon volledig open; de uutrit was geheel en al vrie; doarnoast was d’r op die uutrit nog plekke zat vöar mien auto.

Mien mee- en noadenken wönn niet gewaardeerd. Kosten: 90 euro plus administratiekosten. Gewoon ömdet het niet mog. En det is dus ollemoal bie Neandertaalster Annie begunn. Die was jaloers det Jan het ok met Truus deud. Sindsdien is de mens zonder enige reden monogaam en vergadert de gemeenteroad van Maastricht oaver burgemeester Onno Hoes die op zuuk is noar een neeje relatie. Met Powned as de laffe controleurs van de samenleving. NSB’ers bent het.

Hoeverre had Annie met haar vertrouwen in Jan mu’nn goane? Det Jan het gerust moch doene met Truus as zien Annie mar de enige echte liefde was? Had Annie misschien d’r op mu’nn vertrouwen det Jan d’r ok wel twee echte liefdes op noa konn hoalen?

Annie keus vöar wantrouwen en ging een bittie stiekem op de hoek van de rots op de uutkiek stoane of Truus ok nog eans met de konte leup te zwieberen. Sindsdien is de samenleving op ebouwd uut transparantie eisende burgers, wetten makende volksvertegenwoordigens en onzin handhavende controleurs.

Ie kunt ok gewoon vertrouwen he’mm in mekare en acceptearen as d’r ientie een kear noast de pot pist.

Al die controleurs kunt dan mooi in de zorg goan werken.

Denne van Knöldert

Lees ook

zoekplaatje van de week

Deze foto, met op de achtergrond molen Den Oordt, is gemaakt aan de Vecht bij hotel De Zon en afkomstig van Marco Klompalberts. We zijn op zoek naar de namen van de personen, wie helpt?

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.