Home / archiefcentraal / denne van knoldert leuker kan nie

denne van knoldert leuker kan nie

De reclameleus ‘leuker kunnen we het niet maken, makkelijker wel’, is geniaal. Het gif an det sommige dinge noe ienmoal mut, ok al is het niet leuk. As ie det accepteert is iedere toename van gemak een soart van geluksmomentje.

Vrogger as klein snotjochie (ik ben noe een groot snotjochie) lag ik bie de beugeltandarts in de stoel mien braakneigingen te onderdrukken van het gipshappen en toen zei det meanse: ‘wie mooi wil zijn, moet pijn lijden’. Det is eigenlijk ok ‘leuker kunnen wie het niet maken’, mar dan zonder noar een geluksmoment toe te werken. Ik ben d’r trouwens ondanks die beugel nooit mooier van ewönn.

En de belasting maakt het ok lange altied niet makkelijker. Doar giet de reclameleus dus mank. En as ie knollen vöar citroenen verkoopt, dan smiet ze oe uuteindelijk die knollen wear öm de oaren. Mar ja, ie kunt ok slecht reclame maken met ‘leuker kunnen we het niet maken, en we zijn ook niet in staat dingen makkelijk te maken’.

Ik höar ule denken: “Mar Denne, wrum noe zo flauw oaver de belasting?”

Nou, ten earste umdet ik een boete van 50 euro kreeg ömdet ik de loonbelasting niet vöar 1 januari betaald hadde. Ik had het bedrag wel keurig op tied betaald, mar de belasting-banke en die van mie haa’n op 31 december al lekker vrog de stekker van onderling communicearen d’r uut e trökken. Hun schuld, mien boete.

En ten tweede: ik mos vöar mien bedriefie een cd-rom anleaveren met namen van iederiene die ik het ofgelopen joar onkosten gaf. Een cd-rom, ik wus hillemoal niet det die dingeties nog bestunn… Mar goed, ie wult met de belastingen gin gezeik, dus heb ik alles netties in evuld.

Mar niet netties genog. Ik kreeg een brief met disse tekst: “signaal 503. Omschrijving fout: voorvoegsels niet alfabetisch met naloopspaties.” Zie hebt het disse kear döar de vingers ezene, as ik het volgend joar mar goed doe.

Ik zol niet weten wat ik verkeard doe met ‘voorvoegsels niet alfabetisch met naloopspaties’. Ik heb die zinne nog ea’m in Googler egooid: ‘meestal gaat de taalcoach daar niet op in’, leas ik… Dus ik ben wel bange det ik volgend joar toch een schoer döar de biene kriege.

Leuker kunt ze het niet maken. Makkelijker ok niet.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.