Ik höaren lest det d’r in de smartphone van noe, mear technologie zit dan in de earste Apollo die noar de moane vleug. Is det eigenlijk biezunder?
Wel, as ie bedenkt hoe weinig ruumte zo’n klein telefeuntie hef vöar alles. De tillefoon van vrogger is lomp völle groter en doar kon ie allenig mar met bellen. Oe smartphone is teengswoardig ok oe microfoon, fototoestel, videocamera, videomontageset, kilometerteller, tomtom, hartslagmeter, zaklampe, spellegiescomputer én gewone computer. Dut e d’r in iene muuite ollemoal bie.
Vrogger was det een extra koffer vöar op vakantie. En wel beschouwd is ginien van die dinge oaverbodige luxe vöar een midwekke noar de moane. Stoa ie doar ien kear bie een mooie krater die ze in de vakantiegidsjes nog zo anbeveulen haa’n, dan zol het toch ok zunde weane det ie dan net oe fototoestel hebt thuus eloaten… Bedenk det Armstrong ok nog een schöppe met had (want hoe mos e anders die vlagge de grond in krieng?) en ie begriept wrum of de Apollo zo groot was.
Smartphone, feitelijk zeg de name het ok al: slimme telefoon.
Het kan nog kleiner: ie kunt al een klein pillegie slikken die – tut det ie ‘m d’r wear uutpoept – oe hele lichaam onderzöch. Het pillegie maakt foto’s, dut bloedonderzuuk, inspecteart de darmwand, en zendt det ollemoal digitaal döar noar de computer van de dokter.
D’r bestoat ok al pizza’s met een chip d’r in, zodet oe oven precies weet wat de bedoeling is: “ah, een pizza margarita!, det is 9,36 minuten op 196 groaden.” As ze det onderzuuk-pillegie noe bie in de pizzachip stopt, dan krig oe dokter vermoedelijk iedere wekke wel een kear oe gezondheidsstaat döar. As e vaker zo’n check krig kan e oe waarschuwen: “niet te völle pizza’s etten.”
Mar het kan nog kleiner. Op de universiteit van Twente hebt ze een injectie uut’evunn woarbie ie niet mear hoeft te prikken. Nanotechnologie heet det. Det giet d’r van uut det d’r tussen cellen en moleculen altied nog wel ruumte zit. Via die ruumtje kun ie iets van buten in het lichaam krieng zonder det ie hoeft te prikken. Het ‘Higgs’-deeltie kan zelfs dwars döar rotsen, met de snelheid van het licht (of sneller).
Dan vroag ik oe, wrum bent ze niet in stoat thermoskannen te maken die gin valse lucht löss löat?
Denne van Knöldert
Meer foto's