Samen naar een beter milieu, stund d’r op de vitrine van de AH op het station. ‘Samen’, ‘een beter milieu’, det vund ik wel een mooie Kerstgedachte. Doarbie, het was op het station. ‘Samen naar…’, goed bedacht!
Mar zie haa’n het heel aanders bedoeld, bleek toen ik better keek. Ik mos mien keus maken, vöar ik de döare van de koelvitrine open deud. Achter die döare lag fruit, gesneden fruit, uut heel de wereld vandan.
Ik vroag oe dan toch: hoe goat wie op die maniere noar een better milieu? En met wie?
Ten earste is het toch heel vreemd det d’r in det koelvak appels en pearen ligt. Ja, die mut ie koelen as ie ze in partjes gesneden in het schap legt. Mar niet as ie ze as hele appel of peare anbiedt. Wat een rarerigheid is det, de appels al in de fabriek hapkloar vöar te sniene.
Ten tweede zag ik in het koelvak fruit li’ng det van verre weg kwam. Subtropisch fruit, det niet zelf hier noar is komm lopen, die hebt gegarandeerd het vliegtuug e’nomm. Samen op weg noar een Hollands koelvak. Nuks ‘better milieu’.
Ten derde was het onneudig gesneden en van ver gehaald fruit, verpakt in plastic. Heel völle plastic. Ja, as ie het sniedt kun ie niet anders. En op zo’n station is de doelgroep de hoastige reiziger die snel verleid mut wönn. Det doe ie met gewin, genot en gemak: gezond en lekker fruit, vöarverpakt in een persoons porties.
Zovölle had de stickermaker d’r niet bie bedacht. Die wol allenig mar det ik de döare van de koeler niet onneudig lange open leute. Samen naar een beter milieu.
Prettige kerstdage!
Denne van Knöldert
Meer foto's