Home / archiefcentraal / denne van knoldert enkel

denne van knoldert enkel

Een dubbel dus eigenlijk. In het Engels is angle een hoek. De buurvrouw had het lest ollemoal. Die veul op een zundagse wandeling en toen had en een dubbele enkel die in een hoek van 90 groaden an het bien zat.

Zie hef d’r de kraante nog met ehaald, Zelfs TV Oost. Want zie was niet zo mar uut eglene, het was in een bos woar zwoare machines bomen rooiden. ’t Hele bos op de kop. Kom doar met een bittie ambulance mar ‘ns bie terechte. Ambulancepersoneel hef heur achter in een bakkie van de trekker op ehaald.

Det is al wear zo een wekke of zesse terugge geböard. De enkel is niet mear dubbel. Mar ok nog niet in stoat gewoon wat enkelvoudig werk te doene. Buurvrouw zit in een rolstoele. En dus mut buurman het huusholden doene. En det deud buurman niet zo völle. Die is mear van met de trekker en een bakkie d’r achter döar het bos hen riene.

Ik stelle mie vöar det ik stof zuge terwijl mien vrouw in de rolstoel kik of het goed giet. Ik denke det een kwart kamer goed giet. Misschien een derde. Mar dan zol de de moat wel vol weane. Of de moat van mien vrouw (ie verget det stukkie onder de banke) of die van mie (kun ie een bittie ziene of ik het goed doe?).

Mar buurman hef d’r gin last van. “Ik leare iedere dag bie. En as ik het niet goed doe, krieg ik goeie tips.”

In de supermarkt hef e zich de oong uut ekeken. “Wat bent die groot ewönn in de leste tien joar”, zeg e, en vöar wat e mut kopen nemt ze zien dochter van een joar of tiene met. “Die weet precies woar alles stiet. En die weet ok precies wat wie mut he’mm.” Earst kreeg buurman nog een bosschoppenbriefie met en sloeg e vöar de zekerheid alles dubbel in. Vöaral vöar spul van völle volume as wc-papier is det onhandig. “Mar noe is det niet mear neudig. Mien dochter weet het precies. Ik vinn allenig wel det d’r völle chips döargiet in de wekke.”

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.