Home / archiefcentraal / denne van knoldert zwarte pieten aria

denne van knoldert zwarte pieten aria

Ik wulle iets oaver Zwarte Piet schrie’m, mar ik merke det het mie niet lukt de juuste toon te vinn’. Ik zuuk iets ter nuancering, mar vöar ik het wete goat mien gedachten met mie op de loop en raak ik geëmotioneard. Het giet dan al gauw van dik holt en doar kriegt trouwe leazers als Marjan en Hans wear hartkloppingen van. Iets wat ik niet op mien geweten wulle he’mm.

En toen scheut mie het hier al wel vaker vernuumde ARIA-model te binnen. AmazIng, resistance, imitation, acceptation. Verbazing, weerstand, noa doene en acceptearen. Het is de weg van vernieuwing. Dan zeg d’r iene det e Zwarte Piet racistisch vindt, dan benne wie earst verbaasd en lache wie d’r wat ömme. Dan krieg ie de wearstand, woar wie noe midden in zit. Dan goat wule die klokkenluider een bittie gelieke gee’m en vervolgens is de nieuwe Zwarte Piet geaccepteard.

Det kan heel lange duren. Kiek noar de acceptatie van homo’s. Katholieken en islamieten bent nog steeds niet an acceptatie toe. Benieuwd hoe det met Zwarte Piet giet. “Wat ze d’r noe ok ollemoal van denkt”, zei Peter R. De Vries in De Wereld Draait Door, “oaver tien, vieftien joar is Zwarte Piet veranderd.” Ik denk det De Vries het ARIA-model ok kent.

Toen ik op de binnenflap van Lord of the Rings zagge det d’r een groep is die de trilogie al eleazen hef en een groep die det nog giet doene, ben ik het boek mar goan leazen. Ik geleuve det ik op basis van dezelfde argumenten ok vöar verandering van Zwarte Piet benne.

Mar ik ben ok vöar verandering ömdet ik het racistisch vinne, die Zwarte Piet, net as det ik een konien in een hökkie, een parkiet in een kooi of een peard in de manege dieren beulen vinne. “Och, ie mossen ‘ns weten hoe völle plezier ze d’r met hebt”, vergoedt olders van kinderen (konien, peard) of kinderen van olders (veugeltie) die keus. Mar vrogger haa’n wie ok machtig völle plezier van slaven, dus of det noe zo’n goed argument is…

Kiek, doar goa ik al wear. Vöar ik het wete goat mien gedachten met mie op de loop en raak ik geëmotioneard. Dus ik zeg d’r wieders mar niks van. Behalve dan det de verandering onomkeerbaar is.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.