Home / archiefcentraal / denne van knoldert xtc

denne van knoldert xtc

Van de wekke bent d’r vier mensen dood egoane an XTC. Det wul zeng, iene is d’r dood e goane an XTC, van die andere drie weet wie het niet zeker. De Twidde Kamer wul noe extra moatregelen. Niet öm het probleem op te lossen, mar ömdet d’r verkiezingen ankomt.

Wulke verkiezingen weet ik eigenlijk niet precies, dus het zal van het waterschap of de provincie weane, van die verkiezingen woar allenig politici zelf mar mee bezig bent.

‘De Correspondent’-oprichter Rob Wijnberg schreef d’r een mooi stukkie oaver. De ofgelopen wekke bent d’r wereldwied 736.000 mensen dood egoane an vet en suker, 115.000 an roken, 63.000 an drank en tiene an XTC. “Mag ie roane woar het in de huuskamers oaver giet”, gaf Wijnberg as roadsel mee.

Noa, op de verjoardag van mien zwoager haa’n ze van die vier dinge allenig gin XTC. Mar het gung d’r wel oaver. Noadet wie het natuurlijk earst oaver Zwarte Piet ehad hadden. Det was – wus de blanke visite zeker – gin discriminatie! Mar wie van de feestgangers wel ’n s Zwarte Piet was ewest, gebruken eenmoal geschminkt – gaven ze wat schrikkerig toe – wel een neger-tongval….

Oaver XTC was de verjoardag mild: loat goan! Uutleng hoe gevoarlijk het is en wieders niet te völle andacht an besteden.

Ik geef toe, ik kom niet iedere wekke in de supermarkt, mar lest was ik d’r wear ‘ns kear öm mie een zak peppernötten te kopen. Ik ging noar huus met mien name in chocoladeletters, een kissie wijn öm det weg te spulen en vöar de wicher had ik wat sinas met enömm. As ex-roker kossen mie het muuite langs de breed uutgestalde tabaksrekken te wandelen zonder een impulsanschaf te doene.

Bie De Telegraaf haa’n ze ok chocoladeletters in’ekocht, woarmee ze op de vöarpagina de jeugd van teengwoardig de XTC-generatie nuumt. De letters waren zo groot, det het mar goed is det XTC drie letters hef. Tentfeestgeneratie had niet epast.

En misschien was ‘op zuuk noar gezond leven-generaie’ wel de beste kop. Want det is wat ik öm mie hen vöaral me kriege: de jeugd van teengwoardig is had op zuuk noar een gezondere manier van leam. Minder vlees, mear biologische gruunte en hel vake gewoon een glas water.

Of is det mear het ‘rooie auto’-effect, det as ie ne zelf een rooie auto ‘ekocht hebt, det ie dan oaveral rooie auto’s zidet.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.