Home / archiefcentraal / denne van knoldert st marc express

denne van knoldert st marc express

Wie haa’n lest de glazenwasser an huus en die kon an de oostkante de kozienen niet zo mooi schone mear krieng. “’t Wear zit d’r in”, keek e d’r heel geleard bie toen e mie die conclusie tijdens de koffie meedelen.

Wie haa’n tied zat te proaten. Ik betalen ‘m uurloon, inclusief koffiepauze. Twee tips had hij vöar mie. Vaker de roeten loaten wassen en dan iedere kear de kozien’ gelieke met nemm’. Mar ok: de kozienen nog ‘ns goed opschuren en van neejs of an verven. En hij had ok nog wel een advies. De St Marc Express gebruken as verfreiniger, det zol mie wel anstoane, dach e zo mar.

“Ik heb d’r nog wel tied vöar in mien agenda”, was zien ofslutende opmerking. Woarmee ik zien verhaal van alle kanten in twiefel trökke. Hij was gewoon op een goed gevulde orderportefeuille uut.

Mar noar die St. Marc Express was ik wel neejsgierig. “Noa”, zeg e, en hij deud d’r al een knipoog bie, “doar zit denne-extracten in. Actieve denne-extracten nog wel.”

Een verfreiniger met denne-extracten… Denne-appel, denne-boom, harsvlekken. Det was wat mie döar het heufd scheut. Niet an te bevelen as verfreiniger, zol ik snel concluderend zeng. Mien glazenwasser kon d’r ok gin soep van kokken. Die was blie’m hangen bie de naam-grap. Ik denk det e te völle Geer en Goor kik.

Toen heb ik hem oaver míen Denne-extracten verteld. “Lijnzoad! Det breng ie op het blanke holt en det holt mag gerust van de denneboom weane. Een kear of twee uutstrieken en oe holt wördt waterofstotend. Feitelijk hoef d’r dan agis gin dekloage verf mear oaver. En ie hebt al hillemoal ging verfreiniger neudig.”

An zien oong zag ik det e mear glazenwasser was dan schilder. Ik zeg: ”Wat kiek ie mie glazig an.” Want ik kiek ok wel ‘ns Geer en Goor. “Wat d’r mear van is, as ie in oe dekkende verfloage een schöartie kriegt, sijpelt doar water döar noar binnen en verrot het holt. Mar as ie lijnölie gebruukt, stoot het holt water of en geböart d’r verder niks.”

Mien ramenwasser zag zien extra werk verdampen. Bie mie mos e doarvöar niet weane, had e al in de smiezen. Woarnoa ik ‘m van de koffietoafel noar de leste ramen sturen met de woarden: “en det mensen binnenkozienen verft, det heb ik sowieso nog nooit e snapt.”

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.