Home / archiefcentraal / denne van knoldert niet helder

denne van knoldert niet helder

Ik wol det ik van mien columns konne lea’m, mar det lukt niet. Dus doe ik tussendöar ok ander werk. En doar kreeg ik lest een mail binnen met disse tekst: “Het is belangrijk dat alle impressies door Pubsquared worden gevuld, zodat de iventory groeit, de ecpm wordt geoptimaliseerd en uiteindelijk er meer omzet wordt gegenereerd.”

Ik heb de baas gelieke evroagd of ik op biescholing moche. Hij zeg “Um in het vervolg det soart teksten te snappen?” Ik zeg: “nee, ik wulle mie scholen in een bettere linkse hoek, ientie zo as de beste boksers ok hebt. Dan geef ik de man die zukke teksten schrif een klap vöar de bek.”

Nou, toen moch ik natuurlijk niet op cursus.

Mar ik wol det de wereld d’r teeng op zol treden. Ik hadde lest een man van de gemeente an de lijn die mie iets vreug oaver een bestemmingsplansverzoek det ik in ‘ediend had. Toen die man noa vief minuten uuteproat was (d’r veul iniens een stilte, ik was al lange of’edwaald met mien gedachten), heb ik hem evroagd of e det ok in gewoon Nederlands kon vertellen. Kon e niet. En ik mos niet zo brutoal weane. Ik zeg: “Ja, dan mut ik oe het antwoard schuldig blie’m. Of ik geef oe niet zo’n gek antwoard as det ie de vroage stelt.”

Het is toch gek det d’r beroepsgroepen an het ontstoane bent die het vöar mekare kriegt zo te proaten det anderen het niet snapt. Nog gekker is det ze det zelf ok toegeeft: “Nee, ik stuur oe det ambtelijk stuk niet op, det snap ie toch niet”, is letterlijk teeng mie ezegd.

Toen ik wol goan samenwonen oaverkwaamp mie det. As stukkiesschriever had ik zelf een samenlevingscontract in mekare prutst. “Maar zo gaat dat niet meneertje” zei de notaris. “Vöar die dinge hebt wie ollemoal standaardregels, die bent ollemoal döar de rechter etoetst, jurisprudentie heet det, en dan weet iederiene de betekenis doarvan.”

In mien tienertied was het heel makkelijk. As d’r iene an mien meissie zat kreeg e klap an de bek. (En andersömme ok.) As ie oalder wördt bepaalt de jurisprudentie hoe ie de dingen oplost. Ik gleuf toch woarachtig det ’t doar niet better van ‘e wönn is.

Mar het hölt wel mear meansen an het werk.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.