Home / archiefcentraal / denne van knoldert andermans geld

denne van knoldert andermans geld

1: De regering stuurt dertig man extra noar de Oekraïne noast die vieftiene die d’r al zit, vöar het geval det de plekke woar MH17 nearstortten veilig is. Dan kunt ze gelieke vervolgonderzoek doene.

2: Het regeerakkoord vöar Prinsjesdag is met een memorystick verspreid woarop een pincode as beveiliging zit.

Twee vöarbeelden van ‘andermans geld geef ie makkelijk uut’.

Earst die dertig man, die noe ollemoal kost en inwoning hebt in een hotel ergens in de Oekraïne. Vöar as het iniens veilig is op de rampplak. Nou, ik kan oe vertellen det het d’r pas veilig genog is vöar vervolgonderzoek as d’r al wat langer niet mear eschötten wordt. En ik kan oe ok vertellen det ie in drie uur noar de Oekraïne vliegt. Dus die dertig man kan better thuus blie’m, gewoon het werk doene det ze aans ok doet. Veiligheid kondigt zich wel een kear an, dan is d’r nog tied zat die kaante op te goane.

Dan die miljoenennota. Een mooier vöarbeeld van het peard achter de wagen spannen bestiet d’r niet. Hóe ie die nota ok verspreidt, lekken noar de pers geböart toch wel. Öm de doodeenvoudige reden det politici hun zaak onder de andacht wult he’mm. Det lukt vöar de derde dinsdag van september better dan d’r noa. Want d’r vöar weet ie oe zeker van de andacht. Al was het allenig mar ömdet journalisten dan kunt zeggen det d’r noar hun toe e’lekt is. Toen de NOS van de wekke een lek had, schreef RTL: “noadet ze earst noar oons elekt hadden, hef de NOS noe ok een lek”.

Lekken is vöar een politicus ok vöar de bulk van het neejs uut lopen. Dus ie kunt op die memorystick nog wel 38 veiligheidscodes zetten, een politicus zal altied zien gading in het oar van een journalist flusteren.

En toch zit d’r dan ergens in een duur kantoarencomplex iemand die bedenkt det d’r een veiligheidscode op een stick mut komm. As e det zelf mos betalen, had e anders beslist. Mar het is geld van een ander.

En toch zit d’r dan ergens in een duur kantoarencomplex iemand die bedenkt det d’r al vaste dertig mensen noar de Oekraïne mut vöar ie weet mar nooit’. As e det zelf mos betalen, had e anders beslist. Mar het is geld van een ander.

Tja.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.