Home / archiefcentraal / denne van knoldert freecell

denne van knoldert freecell

Ik ben de earste vakantiewekke verslaafd eraakt an Freecell. Bie warm wear zuuk ik iedere kear eam snel iets te doene uut de zunne. Bie reang mut ik steeds eam ofleiding ömdet ik niet ewend benne zo lange achter mekare een boek te leazen. Bie wakker wönn mut ik de tied doden ömdet ik altied een uur vrogger op benne dan de rest van de familie. En bie etten kokken heb ik toed oaver. Want mien vrouw kokt.

Freecell is dan een heerlijk tiedverdrief. Vöaral de allerearste versie op freecell.nl. Ie hoeft doar niet teeng de tied te spöllen en ie kunt ok met een soart van ‘oepsknop’ de leste stap ongedoane maken, dan nog een kear de leste stap en nog een kear en zo voort. Ie kunt dus straffeloos fouten maken.

Vöar wie het niet weet: ie kriegt acht riejen met alle spöllkaarten open op toafel, vier vrieje plekken woar ie per plekke íen kaarte mag parkearen en vier plekken vöar de oazen. Bedoeling is de kaarten op de oazen te krieng, van de 2 of an. Met schoe’m mag ie in die acht riejen allenig mar kaarten onder mekare leng van steeds een andere kleur en in waarde ientje lager.

Ik heb inmiddels strategieën die mie bienoa ieder spel noar een goed eind brengt. Soms ben ik d’r noa 3.28 seconden al uut. Det brengt mie noar neeje uutdagingen: det ik mar drie van de vier vrieje plaatsen magge gebruken, of det ik alle kaarten gerangschikt wulle he’mm (van koning noar beneden) zonder det d’r nog kaarten op de oazen ligt.

De verslaving is zo groot det ik snel eam een spellegie doe as ik met mien trage internet thuus mutte wachten as de computer een zwoar bestand op haalt, nog snel eam een pöttie doe as ik nog drie minuten te oaverbruggen hebbe vöar ik noar mien werk mutte, det ik nog snel eam een paar kaarten wegtikke vöar ik ’s oams noar bedde goa.

Ik hoale mie zelf vöar, det freeceel mie goed ruumtelijk inzicht gif en det ik strategisch leare denken. Of det woar is? Ik zal noa de vakantie ‘ns kieken of ik op det gebied een universitaire toets kan doene. Doar mut ik – met mien spölfrequentie – met vlag en wimpel vöar slagen.

Ik heb de hele vakantie nog öm te studearen.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.