Home / archiefcentraal / denne van knoldert cbs

denne van knoldert cbs

Ik kreeg een brief van de gemeente det ze mien brief ontvangen hadden. Ik kreeg een brief van het Centraal Bureau vöar Statistiek det ik een boete kreeg as ik een enquête niet in zolle vullen. En de Belasting schreef mie een brief det ik de belasting nog niet in evuld hadde.

Hoe kan het det het zo slecht giet met het postbedrief?

Een brief sturen det ze oe brief ontvangen hebt, is een mooi vöarbeeld van management. Het is bedacht öm de briefstuurder gerust te stellen as e noa acht wekken nóg gin antwoard hef. ‘Zie hebt mien brief in elk geval ehad, dus het zal wel goed komm’. Det het better is sneller te antwoarden, kump in zo’n managers kop niet noar boa’m. Terwijl e met het geld det zo’n ‘wie hebt oe brief ontvangen-antwoardsysteem’ kost, net zo goed een ‘snel antwoarden-systeem’ kan opzetten. Antwoarden mut e toch.

Die brief van de Belasting, wat mut ik doar nog van zeng. In de reclame zegt ze det ze het niet leuker kunt maken. Ik denk det ze het niet leuker wúlt maken. Bie het minste of geringste krieg ie een boete. Zelfs as ie op zoaterdag iets oavermaakt wat zundag oaveremaakt mutt wönn, mar wat moandag pas op hun rekkening stiet ömdet de computer van hun banke in het weekend niet communiceart met mien banke.

Mar die dreigende boete van het CBS, die maken mie echt kwoad. Het was een enquête oaver mien bedrief, hoevölle d’r werkt en zo. ‘Belangrijke gegevens öm beleid op te maken, zo belangrijk det ie een boete kriegt as ie niet met doet’. In de brief stund een code woarmee ik bie de vroa’ng op internet konne. Mar det werken niet. Dus heb ik ze ‘beld met de mededeling det ik ze een boete ging gee’m. ‘Mar det was niet de bedoeling meneertje’.

Zie zollen mie de vroang noe via de post sturen.

“En as ik alles expres verkeard invulle?”

“We vergelijken alles met de gegevens bij de Kamer van Koophandel.”

“Wrum gebruuk ie die gegevens dan niet direct?”

“…”

Ik heb het gevuul det ik alwear een management-loage op het spoar benne, woar wie niks an mist as ze die d’r tussenuut haalt.

Denne van Knöldert

PS: geleuf de neeje CBS-cijfers mar niet, want ik heb de vroang toch stiekem verkeard in evuld.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.