Home / archiefcentraal / denne van knoldert moskou 4

denne van knoldert moskou 4

Mensen die een selfie maakt hebt een psychische andoening, las ik toen ik vöar mien werk een wekke in Moskou wasse. Ik had net een selfie emaakt… En ik mut zeggen: het klopt wel, ik heb psychische andoeningen. Meardere.

Vöar wie het niet wus: een selfie is een foto die ie maakt van oe zelf en oe achtergrond. Handig as ie allenig bent en ie wult toch op de foto, of as ie met oe beiden bent en ie wult saams op de foto. In Moskou nuumt ze det een selfski.

Psychische andoeningen heb ik zat. Zo kan ik goed van de pindakaas ofbliem, mar as de pot ien kear open is, mut e löag. As het reangt, wul ik in de auto det de roetenwissers iedere kear rechts beneden bent, precies tussen twee hectometer-pöalties in. En zo’n wekke in het butenland, wul ik iedere ochtend hardlopen en probear ik het uut te hoalen met allenig mar ’s monns en ’s oams te etten.

Nuum det mar gin psychische andoeningen. Mar ik heb d’r gin enkel probleem met.

Een selfie is handig. Ik was al vaker in Moskou, en had foto’s van Kremlin, Rode Plein en Bolsjoj-theater. Mar det konn’ net zo goed foto’s van internet weane. Ik heb die gebouwen noe ollemoal met mie zelf d’r op. In het park met wegens de val van het communisme uut de stad verwijderde standbeelden, heb ik zelfs een selfie maakt terwijl ik Stalin ömarme. De marmeren man vund het prima.

Het brach mie op een neej app-idee. Ie kunt bie oe berichten smilies (pingpongballegies met emotie) toevoegen. Det mut met een selfie ok kunn. Dan stop ie earst een hele reeks zelfportretten van oe zelf in het geheugen van de tillefoon. Noar links en noar rechts kiekend, lachend, serieus, kwoad, knipogend. Ie kunt dan een foto van oe zelf vöar willekeurig welke foto plakken.

Anderen denkt dan niet det ie een psychische andoening hebt. Ie stoat toch op alle foto’s woar ie graag bie op wult. Eigenlijk kun ie dan dus ok gewoon de mooiste foto’s van internet halen en oe doar zelf bie op zetten.

Feitelijk hoef ie dan nergens mear noar toe öm toch te zeng det ie d’r was. Of is det wear een andere psychiscshe andoening.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.