Home / archiefcentraal / denne van knoldert moskou 2

denne van knoldert moskou 2

Ja, en as ie dan in Moskou bent, mut het natuurlijk ok oaver de Oekraïne goane. De baas van de journalistenschoele in Moskou was d’r helder in: “President Kroetsjov hef De Krim ooit cadeau edoane an de Oekraïne toen ze 250 joar bestunn’. Eigenlijk kump det cadeautje noe wear terugge lopen.

Ik mos denken an Lokaal Alternatief in Heino. Die wult Heino wear lös weken van Roalte öm eventueel bie Zwolle an te sluten. As ze d’r in Heino intrapt komt ze oaver 50 joar kroepend wear terugge noar Roalte.

De Oekraïne blik toch al een samengeraapt stukkie land te weane. Eigenlijk drie volkeren met eigen taal en cultuur, binnen ien landsgrens. Ik zeije teeng de dean det Europa de Oekraïne wel zo wol hemm’, zelfs de rechtse politicus Van Baalen klum in Kiëv op de barricaden öm het volk te oavertuung. “If they want to have it, let them take it”, was höar antwoard. Mar zie snappen niet goed wat wie met al die armoede mossen. Ik zeg: “Europa hef as doel die arme streken rieker te maken.” Zie wear: “Wie bent hier dan de communisten van earlijk zult wie alles delen. Wule of jullie?”

Lastig is det, zo’n andere pette op. Öm oaver de persvrieheid te proaten, kloppen wie an bie een liberale tv-zender. “Ie mag hier wettelijk alles zeng wat ie kwiet wult,” leng ze ons doar uut,.“Mar effectief zit det net anders. Toen een burger vöar ons historische programma vroeg hoe völle dooien het escheld had as wie St. Petersburg in de twidde wereldoarlog earder op e’geem hadden, was det reden vöar de oaverheid kabelaars te advisearen ons niet mear uut te zenden.” De zender bestiet nog wel, mar niemand kan ‘m mear ziene…

“Mar bie het verhaal höart ok det de eigenaar van die zender etrouwd is met een schatrieke Rus, die heel völle belasting mut betalen an het regieme,” voegen de rector toe. “En det ze een moand earder een reportage hadden van ambtenaren die in weelde woonden die ze nooit van hun salaris konn’ betalen.”

Bie de tv-zender höaren wie ok nog det ze soms wel mossen lachen wat wie in Nederland oaver de Oekraïne vöar eschötteld kree’ng. “Just lies” …

Is het bie ons anders? Better? Pauw en Witteman bent van de Vara, die kriegt subsidie öm links te weane. En de lokale omroep is pro gemeente.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.