Home / archiefcentraal / denne van knoldert opgieten

denne van knoldert opgieten

Öm stipt 18.00 uur zaten wie in de betreffende sauna. Det was nog knap zuken, want de opgieting was in de ‘85 groaden sauna’. D’r was ok een ‘holtgestokte sauna’, een ‘die hard sauna’, een ‘grotsauna’ en een ‘infraroodsauna’. Met mie haa’n nog heel wat andere luu ok net op tied de juuste plekke ‘evunn.

Dus hutjemutje maken wie de opgieting mee. Gezellig mar niet heus, van die giechelende oale meansies die töt oavermoat van ramp an het eind ok nog begunn te applaudissearen väor de opgieter die deud as of e de druïde van Astrix en Obelix was. Klappen vöar iene die gewoon zien werk dut, ik weet het niet.

“Groene appeltjes”, zei de druïde, “det is de geur woar wie disse kear vöar goat.” Ie mut oe vöarstellen det een sauna mear dan 70 groaden is. Ie kunt het doar uuthoalen wegens de dreuge lucht. Met opgieten gooit ze water op de kachel wat gelieke verdampt. In die damp zat in dit geval de chemische lucht van iets wat in de verte leek op grune appel. Döar de plotselinge verhoging van de luchtvochtigheid verbrand ie hoast leamtig, die grune appellucht mak ’t d’r niet better op. Mar half lyrisch en gelukzalig kiekend ademt het bezuuk de lucht in. Applaus vöar de opgieter.

De twidde ronde keus ik vöar de grotsauna. Lekker eam wegdoezelen. Toen ik mie de oong noa een paar minuten halfsloap, open deud keek ik recht in het kruus van een vrouw teengoaver mie. Geliek twiefelen ik of de name van disse sauna wel ofkwam van het idee det e in een nepgrot ebouwd was.

De derde ronde zat ik bie de opgieting in de ‘die hard sauna’ en doar gebruken ze de geur van appelgebak. Ok noe: applaus vöar de opgieter. Het begun mie wat op een religie te lieken. Eucalyptus-dampen höart bie de sauna, chemische grune appel kan nog, mar appelgebaklucht… Stellegie gekken.

Mar de kudde löp d’r achteran. Vrogger was de sauna een linkse gezondheidshobby. Doarna werden het rechtse vretschuren en noe bent het de neeje kerken vöar vastigheid zukend volk.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.