Ik mosse noar Moskou. Det is zo nog mar niet edoane. D’r kump een papierwinkel an te passe, ’t is net as of … ik kan de vergelieking nog niet zo gauw vinn’.
Vöar een visum mut ie earst een uutneudiging uut Moskou krieng. En vöar een visum mut oe paspoart twee wekken noar de ambassade in Den Haag. Dus ik heb mie ok mar een ID-kaarte an’eschaft, öm ze hier in Nederland te bewiezen wie ik benne.
Vöar de boardingpas had ik een QR-code op de smartphone loaten binnen komm’. Mar bie de douane gaa’m ze mie toch een stuk papier d’r bie vöar as de batterieje löag zoll raken.
In het vliegtuug moss ik een fomulier invullen met det ik niet mear dan 10.000 euro an wearde bie mie hadde. En bie de douane van vliegveld Domodedovo kreeg ik een briefie woar ik een handtekening op mosse zetten met het bewies det ik d’r wasse.
Mien gastheer maken bie ankomst gelieke een copy van mien paspoart en van det douanebrievie, woarmee e de volgende dag noar het politiebureau mos öm ze doar te vertellen det ik d’r wasse. Doarnoa brach e mie noar de universiteitscampus, woar ik de kommende nachten döar zolle brengen.
Bie de entree wönn mien paspoart vergeleken met de lieste van namen die de bewaking die nacht verwachtten en det leaveren mie een te ondertekenen papiertie op, woarmee ik de volgende dage in en uut konne lopen.
Op de earste verdieping mos ik mie melden bie de huusbaas woar ze met det papiertje en mien paspoart een neej papiertie schreven, woarmee ik mie mosse melden bie een volgend bureau. Doar vreung ze het neeje papier en zie maken een scan van mien paspoart en een scan van mien visum.
Volgende halte was de 17de verdieping woar ik op een neej papiertie per nacht det ik d’r zolle weane een handtekening mos zetten en ’t meanse leut mie alle dage vöartuut oftekenen, anders mos ik iedere dag terugge komm.
Ik kreeg mien sleutel en kon noar mien kamer op de 14de verdieping. Woar ik een lekker lange nacht esloapen heb. Op een völ te warme kamer, det wel, want de verwarming kon niet zachter of uut. Det haa’n ze minder goed vöar mekare.
En ik weet noe ok woar het mie an deud denken. An het anvroang van een bouwvergunning hier in de gemeente.
Denne van Knöldert
Meer foto's